Seroe Colorado merece di haya su 'fair share' den desaroyo di Aruba

Parlamentario Alvin Molina (MEP):

ORANJESTAD (AAN):  Hunto cu Minister Dangui Oduber, DOW y contratista CVC a bishita Baby Beach pa mira e ultimo desaroyonan pa cu Fase 2 di e proyecto cu ta consisti di contruccion di un area di parkeerplaats, iluminacion y construccion di un rotonde nobo. Ta premira cu fase 2 ta wordo entrega den luna di april di e aña aki.

            Despues ta continua cu fase 3, unda cu lo renoba e dos cancha di tennis y traha riba un cancha multi-funcional cu por wordo uza pa beach tennis, beach volleybal y beach futbol. Pa fin di aña aki, e proyecto di Baby Beach ta keda finalisa. E proyecto aki sigur ta eleva e area rond di e beach di San Nicolas y producto Aruba.

            E proyecto ta tardando mas di loke nos ta desea, door di e pandemia e proyecto a haya un “set back”. Baby Beach ta un proyecto bunita, importante y necesario pa San Nicolas y Aruba. Mi ta gradici e comerciantenan local di Colony e.o. Big Mama Grill, Kamini’s Kitchen y Rum Reef cu semper a percura pa brinda un excelente servicio den e area aki.

            E proyecto di Baby Beach ta necesario, si nos mira e direccion unda e area aki ta bayendo. San Nicolas merece e desaroyonan cu ta andando manera por ehempel hotel Secrets cu lo keda cla na final di 2024. Ainda falta mas  pa haci uzo di e potential maximo cu e area aki tin pa ofrece. Manera e.o. ex Esso Club cu mester wordo desaroya pa condominio, e proyecto di Serena cu ta para pa basta aña, tereno di refineria cu riba corto plaso mester tuma un decision kico ta bay pasa cu ne y hopi casnan verval.

            Ministernan concerni ta trahando riba e puntonan menciona. Di mi parti mi lo sigui monitor e desaroyonan y keda den contacto estrecho cu e mandatarionan.

            Desaroya di e area aki ta importante pa turista, pero nos mester percura cu nos hendenan local tambe por sigui gosa di e bendicion cu nos tin na e parti aki di Aruba. Pesey ta bon cu e parkeo y e beachnan ta wordo amplia. Mi ta gradici Minister Dangui Oduber pa su vision y, hunto cu DOW/DIP y CVC, pa realisacion di e bunita proyecto di Baby Beach, Parlamentario Molina a declara.