Condicion fisico y mental di hobennan ta dicidi pa futuro di mundo
*Problemanan mental di hubentud ta exigi prioridad mundial
*E reto di crea futuro den e nubianan scur di inseguridad total
ORANJESTAD(AAN)—Cu 2020 lo a nifica inicio di un temporada nobo, tabata conoci.
Diferente factor importante a marca e planificacion pa futuro, den cual a tene sigur na cuenta e fin traspaso di poder economico di un generacion pa otro.
E salida di e generacion cu a nace despues di Segundo Guera Mundial a marca despedida di e grupo cu tabata encarga cu cambionan historico riba tur tereno y sigur riba tereno economico, financiero y social pero tambe cientifico.
Entrada di Millenials lo mester a tuma lugar den un situacion mundial completamente diferente for di e cambio grandi cu e Pandemia Covid-19 a encera.
Sumanan enorme mester tabata disponibel pa evita cu un grupo mucho mas grandi cu e casi 7 Miyon morto cu e Coronavirus, lo a bira su victima.
Puntonan importante cu mester a haya atencion ora mundo supuestamente a regresa na normal despues cu e vacuna a yuda confronta e malesa tabata, e impacto cu e tabata tin y e trauma cu el a laga atras cerca hopi hoben, cu mundo no a mira na prome instancia como victima di e Pandemia, ya cu e grupo di edad mas halto tabata e grupo mas menasa pa morto directo.
Con grandi e impacto di Covid-19 como malesa y e ambiente cu el a crea tabata, ainda ta den estudio mescos cu e totalidad di efecto cu e tabata tin riba curpa humano.
E problema cu Covid-19 como malesa nobo tabata y ta, cu ta a base di desaroyonan cerca personanan cu a wordo afecta, por bisa kico e enfermedad a haci realmente cu hende.
For di principio a wordo calcula cu e por a afecta mente di hende tambe. Long Covidad ta e nomber di e condicion cu a afecta un grupo di persona sumamente grandi rond mundo.
Con grandi e capacidad financiero internacional pa sigui atende cu e malesa ta? Un pregunta cu ta wordo haci mientras mundialmente reclamo ta drenta di personanan cu a keda cu problemanan causa dor di Covid-19, cu awor ta demostra di tabata tin impacto mental serio riba termino largo pa hobennan cu na forma impactante a bira victima di e Pandemia, cu a mishi cu tur loke ta importante pa un hende.
Mas y mas ta keda demostra cu mucha y hoben a wordo afecta na un forma serio dor di Covid-19 pa loke ta trata nan salud mental.
Depresion ta uno di e problemanan mental serio cerca hobennan, cu despues di Covid-19 mester a biba cu e realidad cu Guera di Ukraine a trece cune y a forma un capa di negativismo rond mundo pa e ser humano.
E menaza continuo di desaroyonan negativo ta stroba hopi hoben mira futuro den e mundo cu mester tuma medida riba tur tereno, mientras industrialisacion y Inteligencia Artificial ta mishi cu empleo, cu ta wordo afecta pa e disponibilidad di placa cu inflacion y recesion ta menaza.
Atencion pa hubentud, apertura di programanan pa asisti e grupo cu a mira su mundo y futuro destrui dor di Covid-19 y e conflicto di Ukraine, ta un necesidad mundial grandi.
Na mes momento mas atencion mester wordo duna na e progreso cu mundo ta haci pa atende cu Long Covid, cu ta stroba capacidad laboral di hopi hende debi na factornan fisico y mental cu e enfermedad a laga atras.
Con mundo lo ta den futuro ta depende di e grupo cu no conoce e potencial financiero y economico cu e generacion cu awor ta despedi, tabata tin pa por a habri caminda pa nan futuro y e mundo, cu Covid-19 a basha abou.
E Guera di Ukraine ta stroba mundo atende na un forma concreto cu e resultadonan di Covid-19 pa hobennan, pa muchanan, cu ta e grupo cu mester dirigi mundo den futuro!
Nan condicion fisico y mental ta determinante pa futuro di comunidad mundial.
Mundialmente mester revisa e fondonan disponibel y e strategia cu mester wordo hiba pa asisti hende cu a wordo y ta wordo afecta te awe cu Covid y pa duna e asistencia mental experto na hobennan cu ta depende di e futuro cu despues di Covid-19 ta naufraga den e nubianan scur di Guera di Ukraine.
