Minister Ursell Arends ta aclarea y enfatiza:
- Pa bira un compania eficiente, efectivo y competitivo
ORANJESTAD (AAN): Den entrevista cu Minister Ursell Arends, el a haci algun aclaracion tocante e situacion actual di Serlimar, cuminzando pa señala cu e compania no ta den bati bancarota, manera tin hende ta pensa. Arends a duna e siguiente relato:
“Ningun hende cu ta den cuido intensivo por lanta for di cama bay core hunga futbol. Dus, mester a garantiza: 1. Paga tur e debenan cu Serlimar tabata tin. Ta 21 miyon florin na debe, mi a bin hereda Serlimar cu ne. Pues, mester a zorg pa paga esakinan, y aworaki cu esakinan ta paga, Serlimar por a cuminza bira competitivo riba e otro areanan cu nan no tabata por competi, cu un debe di 21 miyon florin. Mi tambe lo kier a mira hopi mas tuma lugar. Ora mi a bin ta dos decision mi mester a tuma: Sea paga e debe of laga e compania bati bancarota. A scoge pa paga e debe, pa salvaguardia e trahadornan, pa e compania tin un entrada pa paga e trahadornan y Serlimar por sigui brinda e servicio aki, y esey ta e ruta cu nos a scoge”, e dignatario a bisa.
El a reitera cu aworaki cu e debe a wordo paga, Serlimar ta bay cuminza competi y inverti tambe p’asina aki ta mas eficiente y efectivo den recoge desperdicio, pero tambe procesa esakinan. El a bisa cu tin un mal-interpretacion cu mester tin cuidao cu ne, tocante loke Serlimar ta bisa cu gobierno deb’e.
Loke gobierno ta duna Serlimar ta loke Parlamento ta aproba, y no loke e presupuesto di Serlimar ta manda. Tanten cu Parlamento no aproba e suma, no por bisa cu esey ta loke debe na Serlimar.
Pero si, tin un departamento cu debe Serlimar, cual ta DOW. Esey ta gastonan cu a wordo incuri durante cu e incinerator tabata operacional, riba tereno di dump na Parkietenbos.
“Eynan a crea algun debe cu mester DOW mester paga y no ta debenan di Serlimar”, e mandatario a enfatiza.
El a agrega cu tur cu trabao BCI (Bureau City Inspector) ta haci di recoge sushi, BCI mes ta paga e sushi ora e wordo entrega y procesa. Serlimar no tin responsabilidad di ningun desperdicio di City Inspector. Tambe DOW tin su mesun post pa ora nan entrega nan ‘green waste’, y esey no tin ningun relacion cu Serlimar”, e minister a subraya.
Concluyendo, Minister Ursell Arends a señala cu Serlimar ta operando. “Nos a bisa cu nos kier un compania cu ta financieramente fuerte para riba su pia, y esey ta loke nos a logra durante e ultimo añanan, despues di e resultado di e doorlichting di PwC. Serlimar ta fuerte para riba su pia y aworaki ta bay cuminza dal un paso dilanti, pa bira un compania eficiente y efectivo y ta competitivo tambe riba e mercado aki”, e dignatario a reitera.
