ORANJESTAD (AAN): CEDE ARUBA, den colaboracion cu e fondo Hulandes Fonds Podiumkunsten y partner local UNOCA ta orguyoso pa anuncia un proyecto nobo pa sostene produccion di musica y talentonan musical na Aruba.
E fondonan ta bin for di e “MUSIC HUBS REGELING”, cu tabata existi na Hulanda caba y desde awor tambe ta wordo utiliza na Aruba y otro islanan den Reino Hulandes. E iniciativa aki tin como meta pa yuda talentonan musical pa desaroya nan carera y duna nan mas oportunidad pa sobresali tanto local como internacionalmente.
“E MUSIC HUBS REGELING” lo cuminsa como un proyecto piloto, caminda un grupo chikito di 8 productor local, cu un bon trayectoria, lo selecciona talento musical Arubano pa nan traha hunto. Cada productor lo guia su talento cu un presupuesto. E fondo por wordo usa pa branding, produccion di cantica, grabacion di videoclip, promocion y mas. E meta principal ta pa e talento por a desaroya por lo menos 4 produccion autentico musical, pa asina laga su marca den e industria musical.
Fuera di sosten financiero, e proyecto aki tambe ta provee guia y mentorship pa e producers. CEDE ARUBA y UNOCA lo colabora cu Arubiano Michael Lampe den esaki. Michael Lampe ta un persona cu hopi experiencia den e mundo di produccion y tambe publishing di musica.
Durante e ultimo añanan, Michael tambe a haci hopi esfuerzo pa crea rednan internacional, manera e colaboracion cu Sony Music y Warner. Michael lo guia y mentor e productornan y lo duna sosten unda cu ta necesario pa haci e proyecto exitoso.
E prome 8 productor lo wordo selecciona door CEDE ARUBA, UNOCA y Michael Lampe. E proyecto lo inicia e luna aki ainda. Na final di e proyecto lo tin un evento colectivo, na unda lo presenta tur resultado.
Como ultimo, CEDE ARUBA kier expresa su gratitud na ‘Fonds voor Podiumkunsten’ pa nan confiansa den nan organisacion. E proyecto aki ta importante, mirando cu Aruba tin hopi talento musical y cu e proyecto aki por duna e sosten necesario na nos talentonan, pa asina nan por beneficia mas di e posibilidadnan cu e mundo musical tin pa ofrece.
