ORANJESTAD (AAN) -- Un di e sectornan cu mas a aumenta prijs e ultimo dos pa tres añanan, ta esun di huurmento di vivienda.
Un apartamento chikito, pa un persona of maximo un pareha (sin yiu, y sin mascota), no ta baha di 1.300 florin.
Pero tin indicacion cu e necesidad di un vivienda, cu ainda ta halto na Aruba, ta resalta hopi cerca parehanan di adulto mayor, cu nan yiunan a bay biba apart cu nan yiunan den edad escolar, sea den un cas di huur of un cas cu nan mes a traha, y e mayornan ta keda nan so y kier haya un apartamento cu por adapta na nan situacion y estilo di bida, pero no ta haya, of ta haya si pero mucho caro pa nan situacion financiero.
Tin propietarionan di cas cu tambe ta dicidi, ora nan wak cu e personanan cu ta nan huurdo a keda nan dos so despues di añanan cu a paga e huur religiosamente, ta pidi nan cas bek, pa renovacion (pa huur e hopi mas caro y saca balente ganashi), pero no ta duna e grandinan un lapso razonable pa nan busca otro lugar y muda. Pa ley, ta suppose, nan ta e prome pa bin na remarca pa keda den un bez cu e lugar ta wordo renova, pero esaki no ta realmente un opcion. Un bez cu e ex-huurdo aki a haya un lugar, kizas na careda djis pa no haya mas presion pa devolve e cas na su doño, no ta wordo yama mas, ni ofreci e cas, of nan a hisa e huur na extremo, cu e personanan aki no por tume bek.
Awendia por mira den ciudad, con den hopi edificio ta wordo traha un sorto di studio, chikito pero agradable, pero ta mas bien pa huur cu turistanan, y tambe pa un prijs basta halto pa dia. Na dado momento a wordo bisa cu ta cubri e necesidad di grandinan cu kier biba den e ciudad, unda tur cos ta mas cerca pa nan, por ehemplo un Misa, un bushalte, supermercado, un parke, lugar pa nan cana safe, pero ora di busca informacion, e apartamentonan no a wordo traha en realidad, pensando riba nan. Esaki ta un tema cu ohala, Ministerio pa Asuntonan di nos grandinan, por duna atencion den futuro cercano.
