‘Young Entrepreneurship 2026’
ORANJESTAD (AAN): Departamento di Asuntonan Economico, Comercio y Industria mediante su unidad di Iniciativa pa Desaroyo pa Empresa Arubano (IDEA) ta organizado un serie di workshopnan tocante: ‘Young Entrepreneurship’.
E workshopnan ta forma parti di e maneho di Ministerio di Finansa, Asunto Economico y Sector Primario pa stimula entrepreneurship.
E serie di workshopnan aki ta altamente interactivo y ta diseña pa hobennan entre 18 y 35 aña, incluyendo hobennan cu ta studia, ta traha, ta desaroyando un negoshi, of cu ta explorando un caminda empresarial.
E workshopnan ta duna hobennan conocemento practico, desaroyo personal, y habilidadnan empresarial cu por sostene nan den nan educacion, carera, negoshi, of trayecto como empresario.
Durante e tres dianan di e workshop ta bay presenta e siguiente topiconan:
(1) Inteligencia Artificial (AI) pa Bo Negoshi - Participantenan lo haya un conocemento basico y practico di con nan por uza hermentnan di AI di un manera responsabel den nan negoshi.
(2) Creating Business Connections - E workshop lo ta interactivo y ta consisti di dos dia, cu lo trata: (A) Con pa construi relacionnan autentico pa logra un crecemento personal y profesional. (B). Participantenan lo practica comunicacion y lo crea un plan personal cu lo yuda nan construi relacionnan sostenibel y duradero.
E workshop ta enfoca completamente riba desaroyo personal, relacionnan autentico y networking den e mundo empresarial.
E workshopnan ta completamente GRATIS y lo tuma lugar dianan 30 september, 28 october y 4 november binidero, di 9:00 am te cu 12:00 pm na Departamento di Asuntonan Economico, Comercio y Industria, situa den Cas Veneranda na Wilhelminastraat #7, riba e di dos piso.
Solamente personanan cu ta desea di participa durante tur e 3 dianan den e workshopnan aki y bo ta entre e edad di 18 y 35 aña, por registra na e website aki:
Esaki ta bo oportunidad pa tuma control di bo futuro y cuminsa un trayecto como entrepreneur exitoso. Si bo tin un idea di negoshi of simplemente kier explora e mundo di entrepreneurship, e workshop aki lo duna bo e conocemento esencial y inspiracion pa cuminsa.
