Aruba Dolphins Open Water 2026:
ORANJESTAD (AAN): Falta solamente algun dia pa Aruba Dolphins Open Water 2026, e competencia anual organiza pa Aruba Dolphins Swimming Club. E evento aki lo tuma lugar Diadomingo 27 di September 2026 na Commandeurs Bay, Savaneta, banda di Zeerovers.
E evento ta habri pa landadonan di diferente nivel y edad, y tambe pa tur personan cu ta cla pa challenge nan mes y participa den Open Water. Participantenan por scoge entre e distancianan di 1 km, 3 km y 5 km. E aña aki lo introduci algo nobo pa e participantenan: e relay di 1.5 km. Aki 3 participante lo forma parti di un relay team, unda cada landado ta completa un trayecto di 500 meter.
Riba dia di e evento, registracion lo cuminsa pa 6:30 di mainta, mientras cu e prome careda lo cuminsa pa 7:30. Start y finish di tur distancia lo ta na Pier di Zeerovers.
Cu cupo limita, Aruba Dolphins ta encurasha tur persona interesa pa inscribi na tempo. Inscripcion pa e 1K, 3K y 5K ta costa 35 Florin y lo cera diabierna 25 di september 2026 pa 11:30 di anochi. No lo tin inscripcion pa e distancianan aki riba dia di e competencia.
E Open Water ta mas cu solamente un competencia. E ta un evento cu ta uni landadonan, coaches, famianan, supporters y e comunidad pa bin disfruta di deporte, desafio y e bunitesa di Aruba su lama. Manera costumber, e bar y cushina lo ta bon surti, cu lo ta na benta pa recauda fondo pa e club.
Aruba Dolphins ta invita un y tur pa bin sostene e participantenan y disfruta di un mainta yen di deporte, energia y bon ambiente na Savaneta.
