Mas instancia a uni den e accion di ‘Cuida Aruba’

ORANJESTAD (AAN): E di tres edicion di Cuida Aruba lo tuma luga Diabierna 25 y Diasabra 26 di september,

reenforsando e yamado na comunidad pa sigui traha hunto pa mantene nos isla limpi y bon cuida.

   Durante un rueda di prensa, Prome Minister Mike Eman a presenta e siguiente edicion di e iniciativa nacional hunto cu Rino Hermans, director di Crisis Management Office (CMO), Silvhyanne Vrolijk, coordinador di CEDE Aruba, Chieh Chen Lake, vocero di Departamento di Obra Publico (DOW), y Maikel Gomes, vocero di Bureau City Inspector (BCI).

   Ahustenan pa facilita participacion: Director di CMO, Rino Hermans, a splica cu e experiencia di e dos prome edicionnan di Cuida Aruba a permiti e organizadonan haci varios ahuste pa mehora e operacion.

   Entre e cambionan tin e decision pa mantene cinco categoria di separacion di desperdicio, loke ta facilita e proceso di descarga, reduci e tempo di sinta warda y permiti transporta mas cantidad di material di sushi. Ademas, e horario di entrega ta cambia. E puntonan unda lo tin baki pa tira sushi lo ta habri di 7:00 di mainta te 11:00 di mainta, pa asina por transporta tur e desperdicio na tempo.

   Hermans a enfatisa cu Cuida Aruba no por limita su mes na un dia di limpiesa. Segun Hermans, e meta ta crea un cambio permanente den comportacion di comunidad, evitando cu ta bolbe tira sushi na e mesun luganan despues cu a haci nan limpi.

   Mas organizacion ta suma nan mes: Coordinador di CEDE Aruba, Silvhyanne Vrolijk, a informa cu cada edicion ta atrae mas organizacion dispuesto pa participa. Entre e gruponan cu ya a confirma nan participacion tin AVB, RIU Hotels, Scouting Casibari, Scouting Ora Ubao, Scouting Aruba, Centro Famia Piedra Plat y otro grupo di boluntario.

   Vrolijk a haci un yamado na grupo di famia, amigo, scol y otro organizacion pa registra y participa como grupo, indicando cu e iniciativa ta busca crea un cultura di responsabilidad comparti den comunidad. Cuida Aruba ta cuminsa cu cada ciudadano, señalando cu ora un hende mira un situacion cu no ta corecto, e mester tuma iniciativa y yuda cambia esaki.

   DOW prepara pa e operacion: Na nomber di DOW, Chieh Chen Lake a indica cu nan ta plenamente prepara pa e di tres edicion. DOW lo mobilisa aproximadamente 50 hende pa e operacion y lo sigui traha hunto cu CEDE Aruba pa coordina e diferente puntonan unda por tira sushi.

   Lake tambe a urgi e comunidad pa haci uzo di e oportunidad pa haci rond di cas y bario, limpi specialmente durante temporada di horcan, ora cu desperdicio acumula por crea situacionnan di riesgo.

   Tambe tin declaracion di Bureau City Inspector: "Nos tur tin un rol".  Vocero di Bureau City Inspector, Maikel Gomes tambe ta cla pa mustra nan presencia na e diferente punto pa guia e operacion.

Gomes a haci un yamada pa bisiña y famia yuda otro durante e dia di accion, resaltando cu e esfuerso cu a wordo haci durante e ultimo lunanan no por bay perdi. Segun BCI, mantene Aruba limpi ta un responsabilidad cu mester continua despues di cada accion di Cuida Aruba.

   Amplio respaldo di e partnernan: Ademas di Gobierno di Aruba, Serlimar, Bureau City Inspector, DOW, CEDE Aruba y CMO, diferente empresa y organizacion boluntario lo ta presente den campo pa asisti cu coordinacion y guia, ta urgi  tur ciudadano pa participa den Cuida Aruba riba diasabra 26 di september, resaltando cu cada saco di sushi cu ta wordo piki ta representa un paso mas cerca di un Aruba mas limpi, mas saludabel y cu un sentido di comunidad mas fuerte.