Ser a conoci cu artistanan cu a diseña e First Day Cover Envelopes pa Aruba den 2021

ORANJESTAD (AAN): Riba Diabierna 3 di December, 2021, e diseñadornan di e First Day Covers pa Aruba den 2021 lo tey presente na Post Aruba Oranjestad, di 10am te cu 12pm, poniendo nan firma riba e First Day Covers cu nan a diseña.

Un First Day Cover, na Papiamento Envelop di Prome dia di Emision, ta un producto filatelico (estudio di stampia y historia postal) cu ta consisti den envelop cu tin e stampianan di e emision pega riba dje y e tin stempel di e fecha di e emision. E ta bin cu un diseño na e banda links cu ta relaciona cu e tema di e emision.

E artistanan cu lo tey presente ta:

Sr. Elvis Tromp cu a diseña e serie Agricultura, emiti riba 16 di november 2021, y

Sra. Rhona Lemminga cu a diseña  Tecnica di piscamento y cu lo wordo emiti riba e diabierna 3 di december 2021.

Ademas, Sr. Arthur ‘Tui’ Giel, kende ta un piscador local cu a wordo ilustra riba e stampia di 100c di e emision Tecnica di piscamento, tambe lo tey presente pa firma e First Day Covers y duna esakinan un balor agrega.

Esaki lo ta un oportunidad unico pa cera conoci cu nos artistanan local y adkiri un bunita producto di coleccion cu un gran balor.

Pa mas informacion tocante e actividad aki of productonan filatelico, por tuma contact cu Post Aruba.