Parlamentario Arthur Vallejo --- *Pueblo mester sigui cuida den e temporada di fiestanan
ORANJESTAD (AAN) – Parlamentario Arthur Vallejo, di fraccion di MEP, den conferencia di prensa a duna un mensahe corto pero importante, den cuadro di e dianan di fiesta durante e luna aki, cu pueblo ta celebra e temporada di Pasco y Aña Nobo.
Vallejo a comenta cu den e temporada aki tur hende ta sali haci compranan den establecimentonan y hasta ta aglomera un poco, y pesey e ta importante pa tene e tema di Covid al caso y al tanto.
E parlamentario ta acentua cu e pandemia ainda tey, e no a caba y sigur lo bin otro tipo di variante y olanan den un futuro, y el a bisa cu ta hopi importante si tur famia kier pasa e dianan di fiesta hunto, y cu un tiki libertad, pa un y tur cuida nan mes.
E ultimo fin di siman, e parlamentario a observa cu tin hopi movecion, hopi hende ta sali, locual ta perfecto; esaki ta hopi bon pa comercio y ta un bon noticia cu economia ta mehorando poco, poco, y e kier mira tur comercio cu nan portanan habri, sigur te final di December y habrimento di aña nobo.
Pesey e kier pidi tur hende pa tin nan tapaboca hunto cu nan, uza hand sanitizer, y corda ora di duna man uza alcohol despues, y tuma tur tipo di precaucion necesario pa mantene e establecimentonan habri y tambe Aruba su economia, pa no tin mester di keda cera den cas, den e temponan di fiesta aki, y no perhudica e desaroyo economico di nos pais.
