September ta e ‘Luna di Demencia’ y den e contexto aki a duna informacion den bario

Director di Departamento Adulto Mayor, Desiree Helder:

ORANJESTAD (AAN)- Den entrevista cu DIARIO e director di Departamento di Adulto Mayor, señora Desiree Helder, a indica cu e luna di September ta e “Luna di Demencia”, y den e contexto aki, el a bay den bario, acerca e habitantenan pa duna nan informacion tocante Demencia, no solamente tocante estadistica di cantidad, pero tambe pa loke ta trata kico enberdad demencia ta, kico por haci, kico ta e casonan cu ta encontra, y con por anda cu demencia.

   Señora Helder a confirma cu si falta informacion tocante demencia, y te ainda no tin suficiente  comprension pakico demencia ta. Principalmente, ora un famia lanta na su cas cu demencia, e famia tampoco sa kico nan por haci, kico demencia ta encera pero tambe con e por guia y atende cu e persona debidamente.

   Desiree Helder a señala cu pa e motibo ey hopi biaha tin problema den cas, den famia, pasobra nan no ta compronde kico e malesa ta, anto tin ora nan ta bay den discusion cu e persona cu demencia, of tin ora nan ta bisa cu e ta gaña of cu pa malo e ta hacie, djis pasobra nan no ta compronde kico e ta.

“No solamente esey, pero nos kier enfoca tambe riba prevencion, pasobra tin factornan di riesgo cu ta conoci den demencia, cu eigenlijk ta den nos mesun man. Si acaso nos ta pensa riba factornan manera nos movecion, isolacion social, bebemento di alcohol, humamento, factornan di riesgo manera presion halto, diabetes, ta cosnan cu nos tin den nos mesun man”, señora Helder a subraya.

   Señora Helder a expresa cu nos por evita enberdad, di tin malesanan cronico, of keda cas sin haci nada (isola), nos por evita tambe, den cierto forma, cu nos haya mas hende cu demencia a largo plazo.

“Aworaki tin varios grupo cu ta haci actividad pa adulto mayor, cu ta encera tambe movecion. Ta importante pa bay cerca un di e gruponan aki, gewoon move mas cu ta un bez pa siman, tin ora nan ta haci cosnan cu ta parce pret, manera un baile, of hisa pia, baha pia, pero e ta importante pa bo keda den movecion, pa mantene e balans”, Desiree Helder a remarca.

   Anto ta hopi importante tambe pa evita cu hende adulto mayor por cay, pasobra e problema di balans ta un problema cu bo por wak hopi biaha ora cu edad subi. “Hendenan door di nan mesun edad nan cabes ta draai un poco mas lihe y si nan ta fuera di balans e chens ta hopi mas grandi pa nan cay dal un heup, kibra un heup, un pia, un rudia of un schouder. Kiermen, entre mas nan move y keda den condicion ta miho pa nan mesun salud”, director di Departamento di Adulto Mayor, Desiree Helder a subraya.