Desiree Helder, director Departamento Adulto Mayor:
ORANJESTAD (AAN) Señora Desiree Helder, director di Departamento di Adulto Mayor, den entrevista cu DIARIO, a menciona cu nan kier wak mas grupo, y mas adulto mayor activo, y pesey, nan ta duna subsidio na e Fundacion Movimento ta Bida, pa nan yuda e gruponan social keda activo mas largo, no solamente un dia den siman, pero mas dia den siman y pa nan duna chens na mas hende cu kier uni, pa nan join tambe.
“Y tambe asina, di e forma ey, nos kier habri nan pasadia tambe, pa hendenan keda activo tambe na un manera mas safe, tambe pasadianan pa cuido pasobra tin ora nos ta lubida cu tin hende cu mester cuido, pero tambe nan mester diverti, mester pasa un dia amno, p’esey tambe nos ta bezig ta subsidi’e, pero actualmente falta hopi mas”, Desiree Helder a trece dilanti.
El a agrega cu e ta contento cu tin hopi boluntario tambe, cu tin gruponan y cu ta keda activo. “Y nos mester mas di e gruponan aki pa yuda nos adultonan mayor pa ta den comunidad”, señora Helder a agrega.
Señora Desiree Helder a bisa cu si acaso tin hende cu kier haci algo pa yuda, por tuma contacto cu su Departamento, y nan por guia nan pa acerca sea Fundacion Movimento ta Bida of IBiSA, pa haya mas informacion con nan p or lanta un grupo, y mantene activo tambe.
“Pasobra tin grupo cu tin hopi conocimento, y e ora ey kizas nan mester un guia unda nan por bay. E ora ey tuma contacto cu nos libremente na telefon 280-5004. Naturalmente, semper nos ta yuda cu esey”, señora Helder a indica.
Señora Helder a bisa tambe cu nan ta bezig tambe cu casnan di cuido, pasadianan y tambe e gruponan social, y nan ta trahando un lista di servicionan pa ora un persona cu mester informacion yama. “Locual cu nos kier ta pa esnan cu ta duna e servicio ta personanan bon educa, y cu ta anda bon cu adulto mayor, y ta p’esey ora nos haya e lista ey ta e prome cos cu nos ta wak”, señora Helder a acentua.
