ORANJESTAD (AAN): Gisele-Mireille Sint Jago kende den ultimo eleccion a aparece riba lista di Partido Pueblo Prome, a tuma nota di e decision di Huez.
El a bisa, tanto bal pa tin derecho, derecho humano, derecho di propiedad (bo salario) como trahador. Pakico nos no por haci uso di nos derecho pa welga, si nos accion ta bay contra e acuerdo cu Gobierno di Aruba a traha pa haya liquides di Hulanda? Tanto bal pa bo biba den un democracia caminda supuestamente tin Trias Politica, si huez ta prohibo bo di haci uzo di dje.
Awor ta mira cu Simar no por pone presion riba Gobierno pa kita e 12.6%. No por welga na un manera structural. E ora ey a bira tempo pa bin cu accion di un forma cu nos ta worde scucha rond mundo, te ora cu nos tambe haya un trato igual y humano mescos cu tur ciudadano den Reino.
“Esey ta e conclusion cu mi a yega na dje, ora mi a lesa y analiza e sentencia dd 20 di April 2022 door di huez mr. A.H.M. van de Leur cu a worde duna den e caso di Land Aruba vs Simar. E sentencia final ta demonstra cu e Trias Politica na Aruba y den Reino henter, no ta funciona mescos pa nos tur.”
Sentencia provisional a duna speranza falso: Segun Sint Jago, despues di e sentencia provisional di 2 di maart 2022, ainda mi tabata tin speranza cu e Trias Politica ta funciona na Aruba, na prome lugar pa e motibo cu a determina cu Land Aruba (Gobierno) no a cumpli cu su deber pa evalua e recorte di salario di trahador publico y esnan igual cu 12.6% na December 2020.
Na di dos lugar, cu a establece cu ta Gobierno di Aruba a bin cu e proposicion pa e recorte y no Hulanda, algo sumamente importante nos tin registra huridcamente y cu a reconose cu 2 aña no ta un medida temporal, manera SIMAR y casi tur sindicato a bisa. Huez a exigi di Land Aruba pa bin cu solucion structural pa e corto plazo. Hasta e huez mes a bin cu e proposicion den su sentencia provisional na seccion 4.11 cu Gobierno por a propone un areglo di VUT, yena e vacaturanan cu esnan den ‘overtolligheidspoel’ y mantene e “porta patras” bon cera. Tur esaki, y mas, a duna mi speranza cu nos lo haya un veredicto final cu lo ta husto.
Veredicto final inhusto: Den e veredicto final den seccion 2.7, huez ta determina cu Simar a proba cu e recorte di 12.6% a crea un infraccion riba nos derecho di propiedad, cu ta crea un situacion di reprimicion fuerte. Tambe den e mesun seccion e ta bisa cu e accion di baha e orarionan di trabao pa cumpli cu e pago di 87,4% lo ta uno razonabelmente effectivo pa logra e meta di por haci uzo di e derecho pa negocia collectivamente. Sinembargo, huez ta limita e derecho aki den su decision final den seccion 3.1 y prohibi Sindicato Simar pa tuma accion cu e meta pa nos pone presion y forsa Gobierno pa cambia of hasta kibra e acuerdo cu Hulanda, su motivacion, Aruba tin mester di e placa pa cumpli cu su responsabilidadnan.
Na seccion 3.2 e ta prohibi Sindicato Simar pa por haci uso di cualkier accion cu ta resulta den un temporada indefini cu structuralmente lo pidi pa e trahadornan no traha e oranan cu nan no ta worde paga. Esaki ta un interpretacion sumamente excepcional, caminda un huez ta limita e derecho di welga, dicta cu nos no tin derecho pa worde paga pa tur e oranan cu nos ta traha pa un temporado asina largo y indefini.
Huez ta uza Covid-19 como motibo na seccion 2.13 pa nenga e accion di SIMAR pa baha e cantidad di lesuur structuralmente y ta prohibi nos di uza Covid pa tuma accion? Mientras cu e cortamento di 12.6% a worde causa door di e Covid-crisis? Huez ta claramente midi cu dos diferente midi. Muchanan no por haya menos les, pero nan mester sigui come menos carni y fruta si, pasobra esey ta e effecto di e recorte di 12.6%. Ta e mesun mama, tata, welo y wela cu ta trahando den Gobierno y den e veld di enseñansa cu ta cria un gran parti di muchanan cu ta bay scol. Locual huez por a constata, ta cu e ayudo di liquides no ta sufficiente y Land Aruba tin derecho di exigi mas placa for di Hulanda.
