Ministerio Publico ta mustra cu tur esaki ta cosnan serio
ORANJESTAD (AAN): Corte Comun di Husticia a condena e sospechoso di inicial C.E. recientemente pa un castigo di prizon incondicional pa traficacion di hende (mensenhandel) y contrabanda di migrante (mensensmokkel) y pa pone personanan na trabao ilegalmente.
Esaki ta un caso caminda e sospechoso, kende tabata manager di dos bar na San Nicolas, a trece hende di afo pa traha den prostitucion. Hasta si tabata asina mes cu e personanan envolvi a bay de acuerdo of si nan tabata traha caba como prostituta na nan pais, e cos aki lo a keda un hecho castigabel.
Acusado C.E. ta wordo sospecha di a haci su mes culpabel di a recruta e personanan den exterior y di a trece nan Aruba, y tambe di a pone nan traha ilegalmente durante varios periodo na 2024 y 2025.
Corte Comun di Husticia a enfatisa cu esakinan ta delitonan serio cu ta afecta orden publico y cu ta daña proteccion di hendenan vulnerabel.
U.S. Department of State: E lucha contra traficacion di hende (mensenhandel) ta no solamente importante aki na Aruba mes, sino ta hunga un rol grandi den e forma con nos isla ta wordo evalua pa Departamento di Estado di Merca (U.S. Department of State) den e asina yama Raport-TIP. TIP ta para pa Trafficking in Persons.
Merca ta mira trata di hende como un cuestion di siguridad mundial. Den e Raport-TIP, Merca ta evalua cuanto un pais ta haci pa evita trata di hende, cuanto investigacion e ta haci di trata di hende, con e ta persigui sospechosonan y con e ta proteha victimanan.
E evaluacion aki ta wordo categorisa den un asina yama TIER. Aruba su TIER tin influencia riba e reputacion internacional di Aruba y si nos isla ta wordo mira como “di confia” of no.
Merca a pone Aruba den categoria di TIER 2. Esey kier meen cu Aruba ta presta bon riba varios punto, pero no ta cumpli 100% ainda cu e normanan ancra den e Ley Federal Mericano yama Trafficking Victims Protection Act (TVPA). Aruba tin espacio pa mehoracion.
Loke ta traficacion di hende (mensenhandel): Traficacion di hende ta tocante explotacion di personanan. Ora di explotacion laboral por ehempel, hende tin cu traha bao circunstancianan malo of peligroso, pa poco placa, sin dia liber y sin posibilidad pa bay. Explotacion sexual kier meen cu un persona ta wordo forsa pa sex. Exploitacion criminal ta nifica cu nan ta wordo obliga pa comete hechonan castigabel, manera transporta droga.
Loke ta contrabanda di hende (mensensmokkel): Mensensmokkel ta ora, intencionalmente, ta trece hende ilegalmente na Aruba, hopi biaha cu pago. Un caracteristica importante ta cu e persona mes kier bin paki. No obstante, e ta keda un hecho castigabel.
Trafico di hende no ta explotacion manera trata di hende, pero e por hinca un persona den un situacion vulnerabel si, manera por ehempel, door di debe of door cu e mester traha ilegalmente.
Si bo persona sa di un caso di trata di hende, por favor meld esaki na Polis via tipline 111-41 of na CMMA (Coördinatiecentrum Mensenhandel/Mensensmokkel Aruba) via telefon 592-3231 of tambe via email: This email address is being protected from spambots. You need JavaScript enabled to view it..
