Señora Esther Emerencia-Gomes ta e miho persona pa dirigi Post Aruba NV pa e siguiente añanan

Minister Geoffrey Wever contento y orguyoso:

ORANJESTAD (AAN) Diahuebs 10 di April, den oranan di mainta, a tuma lugar den Post Aruba NV, e nombramento di su director nobo, den persona di Señora Esther Emerencia-Gomes.

   Minister Geoffrey Wever y e Presidente di Hunta di Comisario, señor Antonio Carlo, y señora Gomes, a firma e acuerdo laboral nobo. Minister Wever a expresa cu esaki ta un dia hopi special, cu nombramento di un director nobo cu ta señora Gomes.

“Mi ta hopi contento cu e nombramento aki. Despues di un trayecto largo, nos a yega na e conclusion cu señora Gomes ta e miho persona pa guia Post, den e añanan venidero. Despues di un trabao Excelente cu e Hunta di Comisario a haci pa percura pa tin un management adecua pa Post bay den e proximo fase, mi ta kere cu no tin otro hende miho cu Esther Gomes pa haci e trabao aki” e mandatario a reitera.

Wever a subraya cu Esther Gomes a demostra den su funcion anterior, di tabata un manager legal cu a cumpli cu tur e tareanan cu a wordo rekeri di dje, y esey ta un di e motibonan di su funcion nobo.

“Nos a wak Esther su performance, su determinacion, su profesionalismo y mi ta enberdad hopi contento y orguyoso di por bisa cu esaki ta nos director nobo di Post, un persona hoben, un dama, cu a demostra cu e por. Y mi ta pidi cada empleado di Post pa duna Esther espacio y confianza, pa e por lidera boso den e añanan venidero. E tin tur bon interes di cada empleado y e empresa, y gobierno di Aruba tin pleno confianza den tur su capacidadnan”, Minister Geoffrey Wever a expresa.

E dignatario a felicita señora Gomes y tur empleado y pueblo di Aruba cu nan director nobo di Post Aruba NV. Y tambe a gradici Hunta di Supervision Antonio Carlo y tur su ekipo pa e trabao excelente cu nan a haci cu reclutamento di director nobo di Post.