Lisette Gomes, di Fundacion BVTMV:
- E ta kere den e concepto: “Union ta haci forza”!
ORANJESTAD (AAN) Lisette Gomes, di Fundacion Bo Voz ta Mi Voz, den entrevista cu DIARIO a señala cu pa locual ta traha hunto cu otro instancianan, no a logra ainda. “Como Fundacion nos a acerca Fundacion Respetami, na mas cu un ocasion, dus pa nos sinta hunto y wak na unda nos por yega, y nos ta bolbe haci esaki cu e proyecto nobo cu nos ta bezig cu ne.
“Mi tambe ta kere cu union ta haci forza y e mester bira un proyecto nacional cu nos mester ta hopi pisa riba esaki, pa nos por concientiza na scolnan y haci nos muchanan mas fuerte, cu nan por para y bisa NO, na esaki”, Lisette Gomes a bisa.
Lisette a indica cu Fundacion MVTBV a haci un investigacion hopi extenso, cu a dura mas of menos dos aña y mey, y nos a bin cu un rapport cu tur e puntonan y no solamente esey pero a presenta otro rapport cu ta indica kico e solucionnan ta.
“Tin varios cos cu a cambia den e sistema; e ta dificil pa e comunidad mira esaki door cu e cambio tabata paden, pero tin ainda hopi punto cu mester di atencion. E fundacion a wordo acerca door di e formadornan y nos a entrega nan dos, locual ta e consehonan di e cambionan cu lo mester bin, y nos ta spera cu nan lo tene esaki na cuenta pa por sigui cu e trabao, pa e cambionan por bin”, Gomez a señala.
El a agrega cu tambe loke ta dificil, pasobra e no ta sosode di awe pa mañan, ta e parti di ley, y tin biaha ley ta introduci pero esey no kiermen ta aplicable di biaha. “E ta tuma no solamente gobierno y parlamento, pero e ta tuma e comunidad di Aruba tambe, pa acepta y respeta e ley aki”, Lisette Gomes a remarca.
