Semper e instancianan rekeri ta coopera cu ‘terugkoppeling’ cu Ombudsman ta rekeri ora ta haci investigacion

Juraima Bryson, Ombudsman:

ORANJESTAD (AAN)-- Señora mr. Juraima Bryson, Ombudsman di Aruba, den e parti final di su entrevista cu DIARIO, no tin cifranan concreto tocante e situacion di nos adultonan mayor den nos comunidad, pero Bureau Ombudsman tambe ta sigui cifranan, y mr. Bryson tin indicacion cu e cifranan ta halto.

   “Pero pa mi ta duidelijk si, hasta si e grupo di ciudadano adulto mayor tabata representa un porcentahe chikito, den nos comunidad, e mester di atencion. E hecho cu e grupo ta keda bira mas grandi, e ta nifica cu e problemanan ta bay acumula si nos no por duna nan suficiente atencion. Pero pa mi ta duidelijk si nan tabata 5% di nos comunidad, mi lo a duna nan e atencion, comokiera, pasobra manera mi a bisa, nan ta ser humano cu merece di wordo trata na un forma digno, riba tur area”, señora Bryson a recalca.

   Ombudsman mr. Bryson a reitera cu den e carta pa minister di salud, nan a pidi pa ‘terugkoppeling’ dentro di seis siman, y nan ta keda na spera cu e instancianan concerni por ‘terugkoppeling’ ki pasonan a wordo tuma. “Kizas, nan ta bezig cu algun proyecto cu Ombudsman no ta na haltura di dje, door di e carta nan ta bay duna un of otro informacion, tin biaha instancianan ta pidi pa Ombudsman bin sinta cu nan un rato pa nan duna un splicacion, of Ombudsman splica nan, kizas un parti di e carta cu no tabata suficiente duidelijk; tur eseynan ta den posibilidad. Manera nos ta bisa, nos semper ta accesible, cla pa sinta pero si cu e meta pa mira solucion, si”, mr. Bryson a señala.

   El a subraya cu Bureau Ombudsman ta sigui cu e trabaonan cu si, nan por haci y esaki ta nifica cu nan por sigui cu un investigacion mas grandi, nan por lanza un investigacion unda nan ta pone mas atencion den yuda hende structura.  El a splica cu kizas tin hende cu kier entrega keho, pero nan no kier pa otronan sa cu el a entrega keho, pero si e tin hopi informacion pa duna.

   “Bo ta canaliza e preguntanan, y e tipo di hende cu por drenta. Na momento cu mi ta haci cualkier investigacion, of manda cualkier carta, mi no ta pensa ningun momento cu instancianan no ta bay reacciona, no ta bay cumpli, no ta bay haci ‘terugkoppeling’. Esey no ta e experiencia cu mi tin tampoco. E instancianan ta coopera, nan ta haci ‘terugkoppeling’ na Ombudsman y den caso cu nos ta bisa cu nos tin plan B cu C, nos tin dos luna pa ehecut’e. B ta tarda un tiki mas pa “x” motibo, anto esey ta cosnan cu nos ta tene na cuenta pa tume tambe den locual nos ta haci”, Ombudsman mr. Juraima Bryson a conclui.