Seleccion di Futbol Damas a sali rumbo pa hunga tres wega na Colombia

ORANJESTAD (AAN): Diaranzon atardi e seleccion di Futbol Damas di Aruba, a subi avion rumbo pa Colombia, den cuadro di nan programa di training, y tambe hunga algun wega di fogeo.

   Na Colombia nan lo bay hunga algun wega, tanto riba Diabierna 14 di April, Diadomingo 16 di April, y Diamars 18 di April.

   E prome wega lo ta contra Atletico Nacional Sub-17 Femenino, cu ta un nivel profesional na Colombia.  Despues nan ta enfrenta Club Deportivo Formas Intimas, cu ta un academia di futbol femenino cu sede na Medellin.

   Nan ultimo wega lo ta contra Seleccion Antioquia riba e wega di Diamars otro siman.

   E seleccion di Aruba a prepara basta largo pa e viahe aki, segun Diane Wiersma kende ta coordinador di futbol femenino pa AVB.  El a splica cu e damanan hoben ta hopi entusiasma, e staf a traha basta duro, organizando diferente trainings-camp, pues e preparacionnan cu e mucha muhernan di Aruba aki a pasa aden tabata uno basta largo.