Cantidad grandi di devoto a cana Caminda di Cruz pa Alto Vista mainta trempan

ORANJESTAD (AAN)—Un grupo grandi di devoto tabata tin e curashi di lanta Diabierna Santo, mainta hopi trempan,

pa recore e caminda pa recorda e sufrimento di Cristo Hesus, durante su pasion y morto na Cruz, pa despues Diadomingo corda y celebra cu El a resucita for di morto.

Esaki tabata e Caminda di Cruz pa Alto Vista unda e grupo di personanan aki a reza hunto pa duna forza, salud y sanacion na tur enfermo, sea cu nan ta den hospital, na cas, na cas di nos grandinan, y esnan cu den exterior.

Tambe a haci oracion pa tur persona den necesidad pa Dios por yuda nan alivia nan situacion y problemanan y pa nan tin perspectiva pa futuro. Pa Aruba su hubentud pa keda firme den e FE Catolico y sigui e Caminda di Cristo Hesus pa nan haya bon guia spiritual.

Tambe a reza pa salud di Sumo Pontifice Papa Francisco, pa Monsignor Secco, y pa tur e sacerdotenan pa por sigui guia nos comunidad den e Fe Cristian, y pa tur Catolico na Aruba y henter mundo. A haci oracion pa nos bisiña pais Venezuela, pa por reina paz y trankilidad, y pa nan por haya e yudanza humanitario necesario.

Tambe a pidi Dios pa felicidad, prosperidad, paz, amor y salud pa tur famia na Aruba y pa proteccion di tur yiu. A recorda tur difunto stima pa cada un presente den e peregrinacion: famia, amistadnan y conocirnan, pa e almanan den purgatorio y pa tur esnan cu a muri y no tin ningun hende pa reza pa nan. Asina a haci oracion pa otro causanan tambe.

Riba combinacion di potret por aprecia parti di e Caminda di Cruz.