Seleccion di Aruba ta cla pa weganan Panamericano Junior ASU2025

A tene reunion di despedida pa delegacion cu lo bay Paraguay

ORANJESTAD (AAN): Diabierna anochi den un sala completamente yen y cu hopi energia, a tene e reunion di despedida pa e delegacion cu lo representa Aruba na e weganan Panamericano Junior 2025 cu lo tuma luga den algun siman na Asuncion-Paraguay.

   Esaki lo ta e prome evento di e Ciclo Olimpico 2025-2028 cu lo culmina cu e weganan Olimpico di Los Angeles 2028. Presente durante e reunion aki tabata tin atletanan cu lo participa na e weganan, hunto cu nan entrenador, federacion y famia. Finalmente, tambe presente durante e reunion aki tabata Minister mr. Gerlien Croes, cu a comparti cu tur hende presente cu su persona tambe lo ta presente na e weganan ASU2025 pa asina comparti cu e delegacion cu lo bay participa y experiencia di cerca un evento multi deportivo.

   Minister Croes a expresa gratitud, no solamente cu su participacion na e Weganan ASU2025, si no tambe como un mensahe pa tur miembro di delegacion, cu ta importante pa ta agradecido pa e tremendo oportunidad aki cu masha poco ta logra y cu ta danki pa un gran esfuerso di cada atleta y e apoyo rond di dje cu ta haci esaki posibel.

   E reunion a cuminsa cu un yamada di bon bini di presidente di COA Wanda Broeksema y Secretaria General Nicole Hoevertsz, cu a expresa e beyesa di e experiencia di por ta parti di un wega multideportivo di e magnitud aki. A enfatisa e importancia di gosa di e oportunidad aki y comparti cu tur otro persona di e diferente 40 paisnan cu tambe lo tey pa participa. A corda tur miembro di e delegacion cu ora ta biaha pa participa na un wega asina importante, cu bo ta bira un embahador di Aruba y lo mester representa nos pais dignamente. Adicionalmente, a comparti informacion importante di e parti di Anti-Doping, unda Patrick Werleman a duna un charla breve splicando diferente punto di interes. Concluyendo e parti general, a presenta e “Welfare Officer” cu lo acompaña e delegacion, Sra. Lilah Maduro-Wever, cu ta un psicologo y lo ta encarga cu e parti di “Safe Sport”.

   Despues a sigi un presentacion tecnico y logistico, unda Directora Tecnico Monica Fajardo y Director di Operacion Jonathan Wever a presenta tur e informacion relevante pa cu e weganan ASU2025 pa asina tur miembro di delegacion ta actualisa y tin tur informacion. Aki a presenta tambe e delegacion oficial, cu ta conta cu 12 atleta total den 7 diferente deporte. Ta mira un grupo hoben y cu hopi entusiasmo cu gran parti lo participa na un wega di e tamaño aki.

   Pa conclui e anochi, a haci entrega di e uniformnan oficial y pins di Comite Olimpico Arubano, cu tur miembro di e delegacion ta ricibi pa asina bisti durante e weganan. Entrega di e uniformnan a wordo haci door di Presidente di COA y Minister Croes. Finalmente, a anuncia e abanderodonan pa e delegacion di #TEAMARU, cu lo lidera e grupo durante e ceremonia di apertura na e weganan. E honor a bay pa Maelynn Fradl di Taekwondo y Inald Fernandes Perna di Natacion. Ambos atleta a destaca durante e ultimo aña y awo lo ta e cara di e delegacion di Aruba y lo carga e bandera di nos pais na laira. COA ta desea e delegacion aki hopi exito na ASU2025.