Resultado financiero exitoso di ex Minister Maduro ta publica den e Uitvoeringsrapportage 1e Kwartaal 2025

ORANJESTAD (AAN): E grafico publica den e Uitvoeringsrapportage di e prome kwartaal di 2025 ta refleha e progreso firme cu Aruba a logra bou di e liderato di Xiomara Maduro,

ex-Minister di Finansa, actual Parlamentario, hunto cu su ekipo y coleganan di e Gabinete Wever-Croes I y II.

Cifranan di aña 2017 te cu e prome kwartaal di 2025 ta mustra e trabou haci pa ex Minister Maduro di Finansa y nan ta testimonio di mehoracion den e maneho financiero di Aruba. E logronan financiero ta mas cu cifra so, nan ta refleho di un direccion firme pa bienestar y stabilidad di nos isla. 

 ✓ Sali fo’i deficit, y crea surplus

Di un situacion complica cu deficit grandi prome cu 2017 y despues aun mas grandi durante e añanan di e pandemia (2020-2021), Aruba ta logra bira e pagina. Pa 2023, 2024 y e prome kwartal di 2025, nos ta mira surplus financiero (financieringssaldo positivo) y un saldo primario positivo. Esaki ta crea un buffer financiero importante pa por inverti den infrastructura y duna bek na e pueblo Arubano. 

✓  Gasto di personal controla den un periodo desafiante

Asina mes cu un subida di 11.7% pa indexering, gasto di personal ta keda stabiel y incluso reduci como porcentahe di BBP, bayendo di 9.6% den 2020 pa 6.8% den 2025. E eficiencia y maneho prudente di fondo publico ta evidente den e cifranan presenta. 

✓ Reduccion di debe nacional

Den 2020, debe di Aruba tabata na 115.7% di GDP, un nivel halto y preocupante ocasiona pa e sla grandi di e pandemia. Pa 2025, esaki a baha pa 70% y ta demostra e compromiso pa sostenibilidad fiscal y maneho responsabel cu ex Minister Maduro di Finansa a hiba. E debe di Aruba den moneda nacional y internacional a wordo stabilisa den nivelnan manehabel. 

✓  A mehora credibilidad financiero

E esfuerso pa restaura confiansa internacional tambe a duna su fruto. Ex Minister Maduro di Finansa a logra hisa Aruba su credibilidad financiero cu un investment rating stabiel na un nivel sostenibel segun tres agencia di rating internacional: S&P, Fitch y Moody’s. E grafico ta mustra claramente e mehoracion den ranking financiero despues di aña problematico durante e pandemia. 

“E cifranan no ta casualidad. Nan ta e resultado di trabou duro y serio, decisionnan dificil, y un rumbo firme pa bienestar di e Pueblo Arubano. Nos ta gradici tur funcionario publico, ekipo di Bureau MinFEC y MinFIC, colega Ministernan di Gabinete Wever-Croes I y II, y Pueblo en general cu a haci esfuerso grandi pa logra e stabilidad aki pa Aruba. E logronan financiero aki ta mas cu solamente cifranan, nan ta fundeshi pa un Aruba mas fuerte, mas husto y mas feliz,” ta palabranan di gratitud di ex Minister di Finansa y actual Parlamentario Xiomara Maduro.