Segun investigacion haci pa conferencia “Sex Worker's Health & Safety na Aruba” leynan no ta congruente  

Trahado Social Dameris De La Rosa ta splica:

ORANJESTAD (AAN) – Departamento di Salubridad Publico (DVG) a organiza un conferencia yama “Sex Worker's Health and Safety na Aruba” cual a wordo Coordina pa Michayla van Versseveld.

Dameris de La Rosa, Trahado Social di Centro Colorado, a duna algun informacion tocante e conferencia aki.

            De La Rosa ta un di e personanan cu a haci e investigacion tocante salud y seguridad na Aruba, di e trahadornan sexual, y el a skirbi e puntonan cu bin dilanti durante e conferencia.

            De La Rosa a splica: “Esaki, eigenlijk, a cuminsa como un proyecto escolar; nos mester a haci un research di algun problema social cu tin na Aruba y cu hende no sa mucho di nan. Por ehemplo, den nos caso, tabata e trahadornan sexual, cu ta eherce na San Nicolas.

            Esaki ta e caso cu nos a dicidi di bay cerca dje, pasobra no ta mucho hende ta wak nan como parti di e sociedad. Y e ora ey nos a dicidi di bay wak kico ta e cosnan cu ta pasando, kico ta e leynan pa cada un di nan”, señora De La Rosa a duna di conoce.

            El a agrega cu nan a haya sa cu e leynan no ta congruente. “Tin un legal paradox. Esaki kiermen cu tur e leynan cu tin pa loke ta trabao sexual na Aruba, no ta cuadra cu otro”, e dama a indica.

            Un ta bisa cu no mag tin trabao sexual na Aruba, un otro ta bisa cu si tin trahadornan sexual nan mester bay inscribi nan mes na DBZ pa nan por tin un chekeo di salud, sin embargo prome ley ta bisa cu no mag tin trabao sexual na Aruba, señora De La Rosa ta señala.