Coordinador di actividad Catherine Midi:
ORANJESTAD (AAN) Awe, dia 5 di December, FAVI ta habri su famoso Christmas Bazaar, manera semper hopi creativo, pa e temporada di Pasco di Nacemento 2024. Catherine Midi, Coordinadora di Actividad di FAVI a duna di conoce.
El a splica cu e dia aki lo tin diferente obra di man traha pa clientenan di FAVI mes, y alavez algun snacks tambe nan, y e boluntarionan, a prepara.
Tur cos ta bayendo masha bon. E interes di e clientenan di FAVI tambe ta pusha pa haci di e dia aki, uno hopi exitoso. Asina señora Midi a duna di conoce na DIARIO.
E Bazaar su horario ta mainta di 9:30’or pa 11:30’or. Algun cliente ta bay canta, pa alegra mas e ambiente, lo duna presentacion tambe. E lo ta un dia social unda cosnan bunita ta bay sosode. FAVI ta invita henter pueblo di Aruba pa pasa y experiencia e tremendo Bazaar aki y disfruta hunto cu e clientenan di FAVI y su staf. E meta di e actividad aki ta pa comunidad sera conoci cu locual FAVI ta haci, pero ademas pa recauda fondo pa e Fiesta di Pasco cu su cliente y boluntarionan.
