Segun investigacion dos dosis di vacuna di Pfizer ta proteha 88% contra variante Delta

ORANJESTAD (AAN) – Na Tele-Aruba a tuma lugar un forum tocante e variante Delta, cu participacion di Dr. Carolina Bekker, specialista di pulmon. E preguntanan tabata na encargo di Cherryldine Buckley.

Dr. Bekker a splica cu e programa di vacunacion hubenil ta pa hobennan entre 12-17 aña, y den compania di nan mayornan, y pa muchanan cu menos di 12 aña lo mester warda.

A sigui cu e pregunta cual vacuna ta mas efectivo contra Delta. Chris Goedhart, Beleidsmedewerker na Departamento di Salud (DVG) a menciona cu tanto e vacuna di Pfizer como Johnson & Johnson, cu tambe tin e posibilidad aki na Aruba, ta traha bon contra e variante di Delta. Esun di Johnson & Johnson kizas tin un tiki menos eficiente, pero e ta bon, pero DVG semper ta recomenda e vacuna di Pfizer.

Goedhart a agrega cu aworaki tin un investigacion cu ta saliendo cu ta mustra cu Pfizer ta efectivo contra e variante di Delta.

El a indica tambe cu un solo shot di Pfizer ta proteha solamente un 32 pa 35% pero ora di haya e di dos dosis e proteccion ta subi te cu 88% pa e variante Delta. Pesey ta sumamente importante pa tuma e dos dosis cu un intervalo di tres pa seis siman.

Si un persona a pasa door di covid-19 y despues a ricibi un vacuna, eynan si un dosis ta suficiente pasobra su sistema inmunologico ta bon e ora ey.

El a menciona cu e telefon pa yama pidi un afspraak pa vacunacion ta 280-0101 pa haya un vacuna sea na ImSan of na DVG.

Tambe el a splica cu ora un hende ta haya su prome dosis automaticamente e ta haya un fecha pa e di dos, pero si e persona por a lubida, semper por yama na e number ya menciona pa haya un otro cita. Pero e personanan cu ta haya e prome vacuna por check den e app di Aruba Health e fecha di e siguiente dosis.

Si e persona a pasa seis siman despues di e prome dosis di e vacuna, e por haya su di dos dosis, y ta aconsehable pa yama haci cita.

Tambe si tin hende cu tin duda, no solamente por papia cu su docter di cas pero tambe por yama e number di DVG pa haya tur splicacion tocante e vacuna y e proceso di vacunacion.

El a informa tambe cu e fin di siman aki, tur esnan cu a haya nan prome vacuna por bay tuma su di dos vacuna sea na ImSan of na DVG.

Tin otro variante yama “Lamda” cu ta dominando Pero cu 83%. Dr. Bert Rodenburg a indica cu no ta conoci si e ta mas contagioso of no cu e Delta, pero tur mutacion ta miho pa e virus y peor pa hende. Pero no tin hopi estudio ni conocemento riba e variante Lamda.