Minister Geoffrey Wever:
*Dia 1 di januari esaki a drenta na vigor
ORANJESTAD (AAN)-- Minister di Economia, Finanzas y Sector Primario, señor Geoffrey Wever, den un entrevista cu Matutino DIARIO, a duna di conoce cu for di hopi tempo caba, el a traha riba incentivonan fiscal, y semper e tabata den dialogo cu e doñonan di edificio cu ta activo na Oranjestad y San Nicolas.
“Papiando cu nan nos a yega na e conclusion cu mester un push nobo, un push financiero tambe. Como gobierno, no solamente nos kier desaroya San Nicolas y Oranjestad pero no haci nada y solamente papia, no ta e formula. E ora ey mi a acorda cu nan, cu nos ta bay bin cu un pakete di incentivo halto y cu nos ta bay pone un grupo traha riba esaki”, e dignatario a duna di conoce.
Minister Wever a splica cu ta trata di un comision cu ta contene diferente experto. “Mi tabata tin mas di tres aña cu e proyecto aki; den e gobierno anterior no a logra e cooperacion pa e por bira realidad. Aworaki, den e gobierno nobo AVP-Futuro, mi a logra e cooperacion y aprobacion, y aworaki a drenta na vigor dia 1 di januari, cu e meta cu e inversionistanan, doñonan di edificio, ta haya un periodo di dos aña pa dicidi of pa cuminza cu nan inversion, pa nan por haya e vrijstelling eynan” Minister Wever a señala.
E dignatario a indica cu tambe nan ta trah’e di tal forma cu esnan cu tin edificio pa hopi aña, cu kizas no por of no kier bende, pa motibonan di belasting, tambe lo percura pa duna nan un facilidad.
“Tambe tin e pensamento cu si no kier inverti den un edificio of bo no por, pasobra no tin e fondonan, bende e ora ey na un otro cu si por desaroya e ora ey, y tambe e por haci uso di e facilidad.
Esey ta e manera con el a wordo diseña, pasobra na final di dia doñonan di edificio mester cuminza move. Gobierno ta trece e infrastructura. Nos ta drechando infrastructura den San Nicolas, den Oranjestad, pero si e edificionan ta keda bashi nos mester pusha nan. Tin paisnan unda bo tin un edificio bashi nan ta dal bo cu belasting, pero nos no por cuminza cu un tipo di maneho agresivo asina, si bo no a e stimula nan ainda”, Minister Geoffrey Wever, a relata.
