Omicron a bira motibo pa alarma grandi pa comercio mundial --- Explosion di Omicron ta duna menos tempo pa pais tuma medida --- Siman di fiesta cu menasa serio di malesa cu por presenta den un dia
ORANJESTAD (AAN)- “Na e momento cu e prome caso di Omicron wordo detecta na un compania, famia of organisacion, ya mester tene consideracion cu cantidad di hende a wordo infecta y por sinti e prome resultadonan hasta dentro di 24 hora.”
Esaki ta parti di e advertencia serio cu DIARIO a ricibi di informantenan cu a indica cu e ola nobo di Covid-19 ta caracterisa su mes pa e velocidad cu cual e ta plama y ta anuncia su mes cerca un persona.
“Hopi atencion ta wordo dedica na e hecho cu aparentemente e variante nobo di Covid-19 ta duna menos resultado serio cu tabata e caso cu Alpha, Beta y Delta. E necesidad di proteccion ta bini dilanti, den e velocidad den cual e ta plama y ta duna e prome indicacionnan di su presencia cerca un persona contagia,” a wordo trece dilanti.
Aruba a drenta e siman di fiesta y actividad social cu ta atrae hopi hende y ta uni famianan, cu un menasa serio.
E variante Omicron ta plama asina rapido, cu e por paralisa tur planificacion y hasta luganan di trabou.
E prome variantenan di Covid-19 tabata tuma alrededor di 7 dia pa manifesta nan mes pero tambe pa contagia.
Informantenan clave di DIARIO a indica cu e problema mas serio den Omicron ta, cu si e haci su entrada na un compania of famia, dentro di 24 hora mes otro personanan ta contagia y cu ta cuminsa sinti e sintomanan di e malesa.
Te cu ayera anochi DIARIO a keda pendiente pa informacionnan cu tur parti di mundo ta colecta, ya cu ainda mundo no ta conoci cu tur aspecto di Omicron. Loke ta sigur ta, cu tin caso cu hende riba e dia cu nan a wordo infecta, a sinti imediatamente e prome efectonan di e malesa.
Por lo general por papia di 2 pa 3 dia cu ya un hende ta bira malo.
Esaki ta nifica cu prevencion cu mester wordo tuma, ta algo sumamente serio.
Na mes momento cambionan na diferente pais ta anuncia nan mes, mescos cu na companianan cu personal cu ta wordo afecta dor di e malesa.
Ausencia pa malesa ocasiona pa e virus, ta aumenta na forma masivo. Cu otro palabra, e cantidad di empleadonan cu ta wordo infecta y no por traha mas, ta aumenta loke por paralisa un negoshi of un famia.
Esaki a bira realidad den e sector di turismo, cu no solamente ta ricibi cancelacion di cantidad di persona cu no kier core riesgo durante nan vacacion.
Empresanan cu mester duna servicio den turismo, manera aviacion y crucero, ya a cuminsa sinti e peso di falta di personal y a baha nan cantidad di buelo. Esaki ta ehempel pa loke por spera den tur ramo, pero tambe ta bira importante pa Aruba, cu mira su turismo afecta riba un termino hopi cortico cu resultado pa e pais.
Informantenan experto a pidi DIARIO pa haci un apelacion riba tur hende pa no tuma ningun riesgo cu e malesa y pa proteha nan mes contra infeccion.
Despues di e dianan di Pasco, ya diferente pais a nota cu e cantidad di casonan a cuminsa ta subi pa alcansa nivel alarmante.
Por papia di un explosion cu lo afecta cuido medico den un temporada cu normalmente ta motibo pa mas accidente y na pais cu fuego artificial, tambe e resultadonan cu esaki ta trece cu nan.
DIARIO lo sigui informa Aruba di e peliger di e variante Omicron, cu por tin resultado serio of no serio, dependiente di cada persona y nan sistema di salud, a wordo adverti.
