Coronavirus plamando hopi mes --- ORANJESTAD (AAN): E cantidad di casonan positivo nobo di Covid-19 ta sigui crece na forma espantoso.
Diabierna 24 di December 2021, e cantidad di caso nobo ta 159 persona, di cual 55 ta no-residente.
Diasabra 25 di December 2021, e cantidad di caso nobo ta 176 persona, di cual 57 ta no-residente.
Diadomingo 26 di December 2021, e cantidad di caso nobo ta 148 persona, di cual 58 ta no-residente.
E cifranan aki ta representa un 'Positivity rate' bou di nos residentenan di 43%.
Esey ta pone cu e conteo oficial a pone cu riba Diadomingo e cantidad di casonan activo di Covid-19 pa Aruba ta 883.
Esaki nifica, cu Aruba djis falta 117 caso positivo so mas pa asina yega na e drempel di 1.000 caso activo riba e isla. Esey nifica tambe cu posiblemente Crisis Team lo por bay den seno atrobe pa mira kico lo por haci pa yuda mitiga e brote di Coronavirus den e ultimo siman di December aki.
Keto bay e situacion pa cu grado di ocupacion di Dr. Horacio Oduber Hospital ta abao. Sinembargo e chens pa hendenan cuminza worde hospitaliza ta crece, cada biaha cu e cifra di casonan activo subi.
Actualmente na Aruba tin 4 persona interna debi na COVID di cual den ICU no tin ningun (0) persona y riba piso general tin 4. Na Colombia tin actualmente 6 persona den ICU y ningun (0) riba piso general.
TEST SEGUN BO HORARIO DI CITA:
Acudi na Covid Test Center Hospital solamente riba dia y ora di bo cita! Test Center di HOH ta mira un trend ultimamente di hopi persona cu cita pa haci test cu ta acudi of prome cu nan cita of hasta 1 dia prome cu nan cita. Esaki ta causando un stagnacion den e rij y lamentablemente ta stroba esnan cu si ta mantene nan mes na nan cita ricibi via e Aruba Health APP.
Nan ta pidi tur hende encarecidamente pa por fabor tene pasenshi y acudi riba e dia y ora indica via e Aruba Health APP na Test Center situa na HOH y no bay prome cu esaki. Lamentablemente si encaso bo acudi e dia prome of no na e horario indica, nan lo no atendebo.
Esnan cu no tin cita y tin un of otro sintoma di covid-19 tin di yama Docter di Cas (pa casonan agudo e number di emergencia di bo docter di cas) of yama 280-0101. Acudi na e horario y dia stipula y corda cu despues di test mester warda resultado na cas.
