ORANJESTAD (AAN): Informacion for di Minister Plenipotenciario sr. Guillfred Besaril recientemente a ricibi bishita di e embahador di India na Hulanda sr. Pradeep Kumar Rawat.
Embahador Kumar Rawat a bishita e representante di Aruba na Hulanda pasobra su persona tambe ta representante di India pa Reino Hulandes den su totalidad.
Durante di e bishita a papia riba diferente topico, manera produccion di medicina generico pa cual India ta conoci pe. Uso di mas medicina generico por yuda baha gasto den salubridad publico, cu ta un tema actual na Aruba.
Loke India tambe a desaroya e ultimo decada ta desaroya un industria di IT renombra y na un nivel hopi halto. Riba e tereno aki por sondea e posibilidadnan di mas cooperacion entre India y Aruba.
Tambe un otro aspecto cu India ta conoci pe, ta cu hopi companianan internacional ta haci uso di India pa establece “call centers” pa nan clientenan. Esaki tambe ta un desaroyo innovativo cu tambe por brinda oportunidad pa Aruba.
Minister Besaril a probecha di e combersacion cu embahador Kumar Rawat pa duna informacion general y riba desaroyonan na Aruba. Tambe e mandatario a menciona cu Aruba tin un comunidad di decendientenan di India hopi grandi. Hopi di nan ta comerciantenan cu ta contribui enormemente na e desaroyo economico di Aruba. Embahador Kumar Rawat a bisa Minister Besaril cu e tin plan pa pronto haci un bishita oficial na Aruba pa cera conoci cu e isla y tambe sondea oportunidad mutuo di cooperacion entre ambos pais.
E potret ta pa cortesia di Arubahuis.
