Segun Gregorio Wolff:
ORANJESTAD (AAN): Gregorio Wolff hunto cu Michiel G. Croes e indica cu den Diario di 17 juli 2025 secretario General di SEPPA M. Brito ta haci un sumario corecto di problemanan di trahadornan den sector publico=ambtenaarnan, door di cu tin un escasez di trahadornan na diferente departamento, cual sigur a ser treci door di delegadonan na e diferente departamentonan.
Nan ta indica cu e escasez a ser causa door di personanan cu ta bay cu pensioen, otronan cu VUT y un Aruba cu ta creciendo den habitante. Gobierno ta tuma hende cu contrato cu salario halto pero no pa yena e vacaturanan. E ta papia di un bom cu por bay explota den sector publico .
E solucion cu sra Brito ta propone ta straño y hopi robes, pa no bisa estupido o bobo.
Como lider sindical di trahadornan den sector publico, e ta mas bien duda si tin surplus financiero den e maneho di Gobierno, maske e presupuesto ta indica esaki.
Di dos, e ta proponde pa asuntonan aki wordo discuti den e dialogo nacional/social.
Pa cuminsa cu e dialogo social/nacional, den e dialogo aki tin presente e gremionan di empresarionan, cual organisacionnan semper tin un posicion contra trahadornan di sector publica y semper nan kier retira trahadornan di Gobierno.
Pues den dialogo nacional/social, bay den guera cu e hendenan aki, ta un guera perdi bo ta bringa pa e empleadonan publico.
Loke sra Brito mester haci ta como lider sindical, e ta pidi reunion cu su dunador di Trabao=Gobierno cu e posicion cu tin un surplus financiero y aki sin presencia di enemigonan di e empleadonan publico, bo ta bay lucha pa bo miembronan tocante e escasez di trahadornan. Acerca awor cu tin surplus financiero den caha di gobierno, e mester trece e lucha di gelijkbedrag pa e pensionadonan cu a bay cu pensioen e ultimo 10 añanan, pa nan y futuro pensionadonan cu a traha pa Gobierno, tambe por ricibi nan gelijkbedrag.
Igualmente pa e miembronan cu ta traha na stichtingnan, unda na 20.16, gobierno a kita e Subsidiale regeling cual ta duna e trahadornan di stichtingnan un trato igual na e ambtenaar, cu excepcion di e Ambtenarenrechter y Pensioen.
Atrobe bo ta wak cu maske bo tin 25 aña ta lider maximo di SEPPA, parce e cabes ta bashi y no a siña mucho cos. E ta keda uza tacticanan robes.
Tambe tin e rumor y Caya ta papia cu parce cu empresarionan ta fluister den horea di poco lidernan sindical pa lucha pa un Dialogo Nacional/Social pa nan por kita mas derechonan di e clase trahador, Sr. Wolff y Sr. Croes a declara.
