Bo cara riba camera: Por tin consecuencia legal?
*Si un imagen ta causa daño serio por busca compensacion legal
* Hende tin derecho na respet pa nan bida personal, hasta den luganan publico
ORANJESTAD (AAN): Durante un concierto di Coldplay na Massachusetts den juli 2025, un pareha a wordo capta riba e kiss cam. E hende homber a huy bay abou, mientras cu e muhe a keda mira otro banda. E momento aki a causa harimento den e audiencia, pero prome cu dia siguiente, e video ya tabata viral.
Usuarionan di red social a identifica e dos persona como un CEO y su directora di Recurso Humano (HR), tur dos casa cu otro persona. E resultado: escrutinio publico, consecuencia den trabou y daño na nan reputacion.
Segun un publicacion reciente riba LinkedIn di Orde van Advocaten van Aruba, si un situacion similar pasa na Aruba, graba hende den un evento publico no ta necesariamente ilegal. Den evento publico, generalmente no tin un "speransa rasonabel di privacidad". Pero, un biaha cu e grabacion ta wordo warda, almacena y specialmente comparti pafo di su contexto original, proteccion legal por drenta den wega.
Bao articulo I.12 di Constitucion di Aruba y articulo 8 di Convencion Europeo pa Derecho Humano, hende tin derecho na respet pa nan bida personal, hasta den luganan publico—particularmente ora cu divulgacion ta resulta den daño personal serio.
E ley di Landsverordening persoonsregistraties (AB 2011 no. 37) ta duna proteccion adicional. Un video caminda un persona por wordo identifica, por clasifica como dato personal (persoonsgegeven). Si e video ta wordo warda den un manera structura of buscabel, e por keda bao di un persoonsregistratie.
Articulo 3 ta exigi cu e registracion mester tin un meta legitimo.
Articulo 6 ta pone condicion riba manera cu e dato personal ta wordo obteni.
Articulo 9 ta prohibi compartimento cu otro hende si no tin consentimento explicito skirbi, alomenos cu e ta un obligacion legal.
Pa motibo di esaki, comparti un video online caminda persona ta identificabel y su nomber ta menciona of ta bay acompaña di speculacion, en principio no ta den marco legal.
Ademas, por tin responsabilidad civil. Articulo 6:167 di Codigo Civil di Aruba ta duna base pa responsabilidad si un persona ta publica dato dañino den manera ilegal.
Articulo 6:168 ta indica cu corte mester balansa interesnan den conflicto.
Articulo 6:166 por aplica si varios hende tin responsabilidad.
Articulo 6:162 BW Aruba ta duna un base mas general si e acto ta ilegal, causa daño y ta un violacion di deber di cuido.
Aunke e video di Coldplay tabata dura solamente algun segundo, un situacion similar na Aruba por tin implicacion legal. Si imagen identificabel ta wordo comparti ampliamente sin consentimento y e resulta den daño serio, e persona afecta por tin derecho legal pa busca compensacion.
Orde di Abogado di Aruba ta puntra: Bo privacidad ta proteha realmente, ora bo ta den publico? Un articulo sigur hopi interesante y al caso.
