ORANJESTAD (AAN): Aruba a ricibi cu orguyo e bishita di Christine Duffy, Presidente di Carnival Cruise Line,
cu a yega Aruba diadomingo mainta riba e Carnival Vista. Sra. Duffy, un lider hopi respeta den e industria crucero global, a bishita nos isla como parti di su bishita den Sur di Caribe.
Ora cu a yega na Terminal di Crucero di Oranjestad, Sra. Duffy a wordo ricibi cu un caloroso bonbini for di Ronella Croes, CEO di Aruba Tourism Authority, y Marc Figaroa, CEO di Aruba Ports Authority. E dos ehecutivonan a extende e hospitalidad cu Aruba ta conoci p’e y a expresa nan aprecio pa e relacion di hopi aña cu Carnival tin cu Aruba. Sra. Duffy a expresa su gratitud pa e bon acogida y tremendo bonbini cu e delegacion di Aruba a duna y a comparti su entusiasmo pa pasa e dia na Aruba.
Carnival Cruise Line ta sigui tin un rol importante den e sector di turismo di crucero di Aruba. Carnival Cruise Line ta responsabel pa 25% di tur bishitanan crucero na Aruba pa 2025. E Carnival Horizon tin mas bishita anual, contando cu 26 bishita y ta trece aproximadamente 103,000 pasahero na Aruba. E Carnival Vista tambe ta trece 13 bishita bishita anual y aproximadamente 51,000 pasahero na Aruba pa 2025.
E pronostico ta cu Carnival Cruise Line lo mantene un presencia fuerte, contando cu 23% di tur pasahero di crucero cu lo yega Aruba den 2026. Te cu y incluyendo dia 30 di juni, un total di 514,580 pasahero di crucero a bishita nos isla. Ta proyecta un total di 910,174 pasahero di crucero pa 2025 ta.
Aruba ta sigui fortifica su relacion cu socionan clave den e industria di crucero y ta compromete pa sigui ofrece un experiencia excepcional pa nos bishitantenan, mientras cu ta traha pa un desaroyo sostenibel den turismo.
{gallery}Christine Duffy, Presidente di Carnival Cruise Line ta bishita Aruba riba Carnival Vista{/gallery}
