ORANJESTAD (AAN): E luna aki, Fundacion Venerable José Gregorio Hernández, lo celebra su nobena na honor di Beato José Gregorio Hernández, pa asina nos prepara nos mes pa su fiesta diahuebs 26 di october venidero, cu ta dia di su fecha natal.
E fundacion ta preparando un nobena biblico y cada dia ta bay tin un diferente reflexion cu e intencion pa dia ey.
E skema di e diferente dianan di e nobena ta manera ta sigui:
E prome dia ta dedica na Mundo henter; Di dos dia ta dedica na nos Mayornan; Di tres dia ta dedica na nos Mucha- y Hobennan; Di cuatro dia ta dedica na Matrimonio ; Di cinco dia ta dedica na Iglesia, Papa y Clero; Di seis dia lo tin Rosario bibo y ta dedica na Esnan den necesidad; Di shete dia ta dedica na tur Dokter y Esnan cu ta traha den Salubridad; Di ocho dia ta dedica na nos Gobernantenan y Di nuebe dia ta dedica na tur Enfermo- y Adultonan Mayor.
Riba e di nuebe y ultimo dia di e nobena, tur hende por bin cu un bela pa ofrece na nos dushi Mama Maria.
Durante tur e dianan di e nobena, ta bay tin macuto na entrada di Sitio pa tur devoto por haci donacion di comestibel pa esnan menos afortuna.
Un y tur ta keda cordialmente invita pa bin participa na e nobena cu ta cuminsa diamars, dia 17 di october pa 7’or di anochi y lo sigui asina pa tur e nuebe dianan na nos Sitio di Oracion, situa na Tanki Leendert 128. E fiesta mes cu santa misa di Sanacion ta bay ta diahuebs, dia 26 di october pa 7’or di anochi.
