*Ora puntra gobierno soluciona problema cu surplus, tur ora nan di “no tin placa”
ORANJESTAD (AAN) – Secretaria di “Sindicato di Empleadonan Publico y Priva Aruba” SEPPA, señora Magaly Brito, a comenta cu enberdad den e acuerdo cu Hulanda tin un norma, tocante e limite cu por yega den casonan di personal, y esey segun datonan cu e sindicato tabata ricibi for di Gobierno, y den reunionnan, e ta bahando.
Asina señora Brito a declara den entrevista cu DIARIO. “El a sosode, pero na mesun momento mandando hende cu VUT, tin hendenan cu a bay cu pensioen, etc., e cantidad di trahadornan tambe a baha, pero e falta di trahadornan den lugarnan crucial, clave, tey y e ta grandi, y mescos tin den otro departamentonan”, Magaly Brito a señala.
Brito a agrega cu e mesun gobierno cu a sinta actualmente, ta tumando hende riba contrato, y no a tene cuenta cu e departamentonan unda tin escasez y e tin cu wak su dilanti cu tin un norma te unda e por yega cu gastonan di personal.
“E ta un problema cu e mes ta crea pa su mes te cu na final e pueblo ta bay carga cu e consecuencianan. Anto p’esey nos ta haci un apelacion na nos gobernantenan, na nos politiconan, pa e tipo di situacionnan asina eyden. E ta un situacion cu ta regarda Pais Aruba. Ban ta cauteloso y tuma decisionnan cu ta soluciona problemanan cu nos pais, cu nos hendenan ta pasa aden, pasobra aworaki e problema di escasez di personal den diferente departamento ‘tarde of temprano’ ta un bomb cu ta bay explota”, Magaly Brito a expresa.
Brito a comenta cu nan a bisa gobierno cu e por soluciona e problema aki pasobra tin placa, tin surplus. “E reaccionnan no ta manera cu nos a spera cu bisa cu si, cu ta berdad. Contrario ‘ta bisa no tin placa, no tin placa pa nada’. Kiermen, na final nos no sa unda e placa a bay, nos no sa si enberdad tin surplus. E ta un tema hopi dificil cu mi ta kere cu ta bon pa nos sa e debe di Pais Aruba, y kico ta e situacion financiero y economico di nos pais, wordo plantea na nivel di un dialogo social di tur partner, tur hendenan envolvi cu por haya e cifranan manera mester ta y djeynan pa dilanti por atende cu tur e problemanan cu tin”, Magaly Brito, Secretaria General di SEPPA a enfatiza.
