Anuesca Baly (SKOA):
- Scolnan ta lucha cu retonan diario
ORANJESTAD (AAN) – Anuesca Baly, directora di SKOA, a comenta den entrevista cu Matutino DIARIO, cu na scolnan di SKOA tambe ta presenta e situacion di problemanan social cerca algun alumno, unda ta papia tambe di salud mental.
“Cada scol tin nan retonan. Den MAVO tin nan zorg coordinadornan, y nos mentornan tin biaha ta señala esaki, y nan ta cuminza sigui e protocol cu nos tin na SKOA, pa cu e yudanza pa e alumnonan aki. Sea nan ta wordo referi na Stichting Hunto, Respaldo, dependiendo di e situacion, pa busca tur yudanza cu por”, señora Anuesca Baly a señala.
Baly a duna di conoce, cu desde aña pasa, School Maatschappelijk a subi cu tres Trahado Social extra, cu tambe ta duna sosten na SKOA su scolnan.
“Mi ta keda bisa semper cu scol tin un responsabilidad pa señala pero comunidad tambe tin un responsabilidad, den e caso aki e mayornan. Pasobra e no ta facil! Bida no ta facil pa ningun hende, e ta duro; sea bo tin of no tin trabao, pasobra diferente factor ta hunga un rol, pa diferente malesa cu por tin den nos comunidad. Nos tin un lazo hopi fuerte cu DWJZ, cu ta drena nos scolnan anto via di nan, nos ta purba sigui monitorea nos alumnonan. Y nan tin e deber di autoridad pa sigui monitorea hobennan te nan 25 aña. Anto esey ta un di e lazonan cu nos ta reinforza durante di e añanan, cu DWJZ, Wit Gele Kruis y Stichting HUNTO, Respaldo, MBC. Di parti di SKOA nos tin cu bisa cu nos tin un bon sistema, pero tambe un bon network cu tur instancianan cu ta yuda”, directora di SKOA Anuesca Baly a subraya.
El a agrega cu semper por ta hopi miho y nan ta trahando riba esey pasobra e situacion di hopi hoben den nos comunidad ta hopi desafiante, cu diferente reto manera salud mental, y problema social cu ta hopi y ta cuminza na cas. “Si nos ta forma e triangulo cu mayor y cas pa cu alumno, nos por logra hopi pa e alumno aki bira un miho ciudadano”, Anuesca Baly a conclui.
