Impresion eroneo di informacion di Universidad di Colorado
*Peligro horcan pa un pais no ta sin mas mara na total pronostica
ORANJESTAD(AAN)—Kico por spera di un temporada di horcan ta un pronostico cu den pasado tabata exclusividad di expertonan di National Hurricane Center na Merca.
E meteorologo Mericano, William Grey tabata fungi como profesor na Colorado State University y a haya renombre mundial como profesor na Colorado State University y como pionero den realizador di pronostico di temporada di horcan.
El a retira na 2005, pero te awe e pronostico di Colorado State University pa temporada di horcan ta wordo presenta mundialmente banda di e pronostico oficial di National Hurricane Center na Merca, cu ta e autoridad encarga cu avisonan oficial di peligro di horcan pa e region Atlantico.
Kico por spera di temporada di horcan ta depende di cantidad di factornan di condicionnan di tempo y ta costumber cu National Hurricane Center di Merca ta duna nan espectativa na inicio di e temporada.
E popularidad di professor Grey tabata tin como resultado cu te awe mundo ta pendiente tambe di e pronostico di Colorado state University cu siman pasa a baha e cantidad total di horcan cu ta wordo spera pa 2025 levemente.
Nan ta spera cu e cantidad di sistemanan cu lo alcansa costa na Merca lo ta algo menos di loke nan a pronostica oficialmente.
E informacion cu Colorado State University a baha nan pronostico masha poco, no por mishi sinembargo cu e realidad cu henter e region Atlantico cu por wordo afecta pa sistemanan di temporada di horcan, mester ta debidamente prepara teniendo cuenta cu e realidad di cambio di clima cu ta aumenta e posibilidadnan pa un tormento nace y mantene su mes manera sigur ta e caso cu e temperatura di laman.
Informantenan di DIARIO a indica, cu e realidad di temporada di horcan ta wordo afecta cu interpretacionnan di informacionnan cu por crea pensamentonan cu ta afecta e estado di alerta di tur habitantenan di paisnan, cu den e temporada di horcan por wordo sorprendi pa un sistema.
Sistemanan di naturaleza no ta mara na espectativanan di hende y sigur den temporada di horcan no por tuma ningun riesgo cu informacionnan cu no ta afecta e realidad di e cambio di clima, cu ta entrega prueba di ta afecta mundo.
Expertonan encarga cu pronostico oficial di temporada di horcan 2025 ta papia di un posibilidad di un temporada riba averahe loke ta duna sigur motibo pa ta alerta.
Ademas mester tene semper na consideracion cu un solo sistema tropical riba su mes por ta riesgo pa cualkier pais pasobra ningun experto por bisa di antemano cual ta e rumbo cu cada sistema tropical lo sigui den su desaroyo.
Pues peligro di horcan ta depende di e lugar y trayecto di cada sistema loke ta nifica.
E pronostico di Universidad di Colorado no por wordo interpreta for di su realidad y asina ta crea pensamentonan peligroso pa Pueblo cu mester ta prepara pa e temporada na un forma responsabel y a base di reglanan oficial dor di instancianan oficial pa atende cu e temporada di horcan, cu no mester ta mas of menos activo, pa por presenta cualkier situacion peligroso pa un pais.
