Nan lo wordo warda pa ser bendi na December 2025
- Sin Pagara pesey cambio di aña Aruba a keda basta limpi
ORANJESTAD (AAN): E stock di klapchi cu e comerciantenan di Aruba a manda busca durante 2024, di cual tur ta paga completo, ainda ta stagna y tumando espacio na China. Y esaki ta espacio cu China lo kier haya liber pa asina prepara pa produccion di klapchi nobo.
Esey ta nifica cu e comerciantenan na Aruba a busca forma pa busca e containernan aki for di China pa nan yega Aruba. Y aparentemente esaki a wordo logra, y un compania di shipping a bay di acuerdo pa haci esaki. Specificamente pa esaki, awor na Aruba ta buscando permiso pa den prome mitar di 2024 ta haya OK pa importa nan via Waf di Aruba, y pa nan wordo poni den Deposito di Wela.
Rubin Ponson, encarga cu klapchi pa DOW, a indica cu enberdad a haya e peticion aki, pasobra ta for di mey-mey di luna di februari 2025, e barco cu como 20 pa 22 containernan di klapchi aki lo subi lama rumbo pa Lama Caribe.
Ponson mes ta calcula cu kizas na luna di maart of april 2025, lo por bay ricibi e containernan aki na Aruba. Ki dia exacto lo yega Aruba no ta conoci, pero hecho ta cu e barco tin di pasa laga containernan na e.o. Aruba, Curaçao, Bonaire, y Suriname.
Pues si e barco yega cu container e aña aki, esey nifica cu pa Fin di 2025 lo tin tur klapchi bek atrobe obtenibel, incluyendo e flowerbeds cu tur hende gusta, y tambe Pagara cu a haci hopi falta durante luna pasa.
Tin diferencia den klapchi di China vs. esnan di Merca cu luna pasa a wordo importa? Na opinion di Rubin Ponson, e tipo y procedencia di klapchi no tin nificacion pa autoridad na Aruba, tanten cu na ta cumpli cu tur regla cu tin stipula na e isla. Aunke nan sa cu e exigencianan na Merca ta mucho mas halto compara cu esnan na China (e.o. e contenido y nivel di polvo, etc). Pesey e klapchinan di Merca ta un tiki menos poderoso, compara esnan cu ta bin direct for di China pa Aruba.
Pero toch en principio, tanto e Klapchinan di Merca y di China ta haci mesun trabao, pues di duna un show bunita den cielo cu e Flowerbeds. Loke ta hunga un rol ta e prijs, pues loke ta cumbini e importador for di unda e ta busca su Klapchinan y su ganashi.
Ponson a indica cu enberdad a nota cu luna pasa, Aruba en general a keda “mas limpi” compara cu ora cu tin Pagara ta wordo tira. Pero toch tin di corda cu durante fin di aña, bo ta haya grupo den comunidad cu a haya falta di Pagara, a haya falta di e sacudimento di Pagara, y tambe ta haya otronan cu no kier tende nada di klapchi, y esnan cu ta gasta ni 1 cen preto di klapchi.
Pero hecho ta cu casi no tabatin sushedad laga atras a causa di Pagara.
