Mas base advertencia DIARIO pa final prome 25 aña Siglo 21
*Formacion Gobierno Arubano nobo den tension regional serio
*Gastonan Reino Hulandes pa seguridad y defensa lo sigui crece
ORANJESTAD (AAN) — “Gobernacion di Aruba mester ta basa riba maneho bon delinea den cual ta evita tur aumento di gasto y mas bien ta sigui crea reserva den un situacion mundial y regional explosivo.”
Esaki ta parti di informacion concreto entrega na DIARIO di parti di expertonan cu hunto cu DIARIO a analisa un serie di desaroyonan mundial y regional sumamente importante, cu por tin efecto directo riba e bienestar nacional di Aruba.
Expertonan ta indica cu e recuperacion financiero di Aruba cu a wordo logra dor di Gabinetenan Evelyn Wever-Croes mester continua y mester sirbi como modelo pa gobiernonan forma pa cualkier partido politico.
Manera DIARIO a trece dilanti den su edicionnan anterior, Reino no ta permiti Aruba hiba maneho financiero cu no ta cuadra cu exigencianan impone pa supervision financiero di Reino.
Informantenan ayera a bati un alarma mas grandi y a mustra riba e peligernan regional creciente pa Aruba na Januari 2025 den porta di Aruba, manera a wordo adverti for di inicio di 2024 debi na e rumbo di Gobierno Venezolano.
Mientras e momento pa Nicolas Maduro prolonga su mando Presidencial contra e resultado real di eleccion Venezolano, Venezuela ta registra mas y mas problema politico cu ta resulta den mas persecucion politico.
Esaki ta tuma lugar na momento cu Donald Trump ta prepara pa asumi Presidencia di Estados Unidos y a mustra cu e lo regresa na su posicion estricto contra Nicolas Maduro.
Un cantidad di persona cu nacionalidad Mericano lo a wordo detene dor di Nicolas Maduro cu ta bisa cu e grupo di siete persona di nacionalidad Mericano cu el a duna orden pa detene, ta personanan cu ta atenta contra su Gobierno.
Informantenan ta papia di un situacion sumamente tenso den e region di Aruba mientras Reino Hulandes ta sumamente ocupa cu e situacion alarmante na Ukraina, cu a exigi un asistencia financiero enorme atrobe di Merca na momento cu Presidente Biden ta despedi den cambio di Gobierno Mericano.
Ta den un situacion mundial creciente, Inglatera y otro partinan di Reino Uni a cuminsa ta tuma medida den forma di introduccion di permiso di entrada pa e pais pa cuidadanonan di un cantidad grandi di pais.
E medidanan aki lo ta valido pa biaheronan Hulandes tambe.
Personan cu kier biaha pa Inglatera, Escocia, Wales, Irlanda del Norte of Islanan den e Canal Ingles, for di entre otro Merca, Canada, Brazil, mester registra nan mes awor hasta si ta di transito nan lo permanece na e paisnan di Reino Uni (tambe yama Inglatera na Aruba).
Segun informantenan mas pais ta bay sigui e areglo cu lo conta tambe pa ciudadanonan Europeo pues entre otro.
DIARIO ta atendiendo cu varios informacion importante cu ta mustra riba sumanan enorme cu Merca tambe lo mester sigui hinca den e Guera na Ukraine cu ta continua.
Na e momentonan aki segun informante Aruba mester prepara pa un situacion regional y internacional serio mientras DIARIO lo sigui informa.
