Ing. Dayl Lue, Hefe di Infrastructura na DOW:
*Cantidad di keho drentando na DOW
ORANJESTAD (AAN) – Ing. Daryl Lue, Hefe di Seccion di Infrastructura na Departamento di Obranan Publico (DOW) a señala den entrevista cu DIARIO, cu DOW ta hayando hopi keho e dianan aki, cu tin buraconan riba caminda.
Ing. Lue a señala cu esaki ta debi cu ultimo simannan a cay hopi yobida na Aruba, y e camindanan no ta wanta esaki y unda cu tin buraco cu a wordo tapa ta habri mas lihe.
El a comenta cu Arubaanse Wegen Bou, tabata tin un bou stop cu tur contratista desde 13 di December te cu ainda. Esaki kiermen cu DOW tin dianan limita cu por ricibi asfalt. “Den e caso aki dos dia pa siman nos ta ricibi asfalt pero esey no ta suficiente si nos mira cuanto awa a yobe, cuanto buraco tin habri y cuanto keho tin”, Ing. Lue a señala.
E funcionario a menciona cu DOW lo haci prioridad cuminzando pa yena e buraconan mas grandi, ya cu tin hopi keho di esaki. El a agrega cu si no tin asfalt mes e team di Infra ta bezig ta mezcla santo cu un tiki cement, pa tapa toch wanta e buraconan. Na e momentonan aki no ta prudente pa uza asfalt frio, pasobra e ta traha cu piedra hopi fini, y ora ta yobe e ta sali mas lihe y por crea mas peliger riba caminda.
Departamento di Infrastructura di DOW ta registrando tur e kehonan cu drenta, y ta monitor wak un ke otro, kico ta e buraco mas grandi unda cu tin cu atende di biaha, y nan ta uza e mezcla cu nan ta trahando di santo cu cement pa alivia e situacion.
