Scouting Aruba a celebra Dia di Jorge cu un marcha uniforma di 9 grupo scout di Aruba

Grupo Scout Ora Ubao Aruba:

• liene Corsen a wordo instala oficialmente den e Hoofdbestuur
• Julisa Boekhoudt a ricibi un reconocemento special 

ORANJESTAD (AAN): Scouting Aruba a conmemora cu orguyo e celebracion anual di Dia di Jorge, cu mundialmente ta ser celebra riba 23 di april. E dia aki ta dedica na San Jorge, patrono di tur scout, simbolo di balentia, perseverancia y servicio. Como parti di e celebracion, diasabra 25 di april 2026, Scouting Aruba a organiza un acto oficial cu participacion di 9 grupo scout di Aruba, incluyendo Grupo Scout Ora Ubao Aruba (GSOU).

   E celebracion a cuminsa cu un marcha ordena for di punto di e encuentro, sigui pa un ceremonia formal na Wilhelmina Park, unda tur grupo a bin hunto pa conmemora dia asina importante. E programa a inclui momentonan significativo manera renovacion di promesa scout, oracion door di Pastoor Jairo Maduro, historia di San Jorge y e instalacion di e Hoofdbestuur nobo pa e periodo 2026–2029. Presente na e ocacion tabata Prome Minister Mike Eman y Parlamentario Evelyn Wever-Croes kendenan a felicia y gradici Scouting Aruba pa e bunita trabao cu e movimiento aki ta haci den nos comunidad.

   Grupo Scout Ora Ubao Aruba a expresa su gran orguyo pa dos di su miembronan. Iliene Corsen a wordo instala oficialmente den e Hoofdbestuur como HKC Training en Vorming, un logro importante den su trayecto como lider. Tambe, Julisa Boekhoudt a ricibi un reconocemento special pa su compromiso continuo cu Scouting Aruba desde su inicio te cu awo—cu ta un muestra di su dedicacion y servicio na scouting.

   Scouting Aruba ta celebra 25 aña di existencia na Aruba. Pa e motibo aki tambe tur scout presente a ricibi un badge conmemorativo como simbolo di dedicacion di scout na Aruba.

   E anochi a cera cu un kampvuur, creando un espacio di reflexion, fraternidad y contamento di storia. Durante e actividad, e historia di San Jorge a wordo comparti, reforsando e balornan fundamental cu e movimiento scout ta representa.

  Scouting Aruba ta un plataforma di formacion integral pa hobennan, enfoca riba liderazgo, disciplina y compromiso social. Actividadnan manera esaki no solamente ta fortalece e union entre miembronan, pero tambe ta reafirma e impacto positivo di scouting den comunidad.