Scol Preparatorio Tarcisius a devela nan emblema nobo

ORANJESTAD (AAN): Un dia di celebracion, progreso y inversion den futuro di nos muchanan den bario di Mabon.

   Cu hopi felicidad y orguyo, siman pasa Ministro di Enseñanza Gerlien Croes, hunto cu mas funcionario a celebra hunto cu e ekipo y muchanan di Scol Preparatorio Tarcisius a devela nan logo nobo y inauguracion di un area di hunga completamente renoba, cu dak nobo y structuranan recreaccional.

   Despues di Ministro su bishita haci aña pasa, nan a compromete pa financia y haci e trabaonan necesario pa e muchanan por tin nan dak debido pa asina crea un espacio mas sigur, confortabel y adecuado, caminda muchanan por hunga, move y desaroya.

   Na mes momento, partnernan manera Astec y APA, a haci entrega di digiborden nobo, creando mas oportunidad pa un enseñansa moderno y interactivo.

   Cada mehoramento den scolnan ta un inversion directo den bienestar, felicidad y futuro di nos muchanan.

   “Pabien Scol Preparatorio Tarcisius cu e logronan bunita aki! Mi aprecio na tur educador, partner y stakeholder pa nan dedicacion y contribucion. Nos ta sigui traha hunto pa crea e miho condicionnan pa nos muchanan siña, crece y desaroya,” Ministro Gerlien Croes a declara.