Scol basico Xander Bogaerts y DAS cu iniciativa di un Carousel informativo pa mayornan

Pa yuda e famianan ora tin problema: --- ORANJESTAD (AAN) – Haildy Castaño- Ridderstap, Hefe di Hulpverlening Eerste Lijn na Departamento di Asunto Social (DAS), den entrevista cu Matutino DIARIO,

a duna informacion tocante un iniciativa di Scol Basico Xander Bogaerts hunto cu DAS, di bin cu un Carousel cu a tuma lugar na scol Diaranzon di e siman aki, atardi.

E funcionario di DAS a splica kico ta e idea tras di e proyecto aki: “E idea ta pa nos ta mas ‘outreaching’ pa yega cerca e mayornan y e muchanan den bario, wak kico e asuntonan ta y di ki forma nos por acapara y yuda nan”.

Seguidamente, señora Marushca van der Linde, IBer na scol, a menciona cu door cu na scol nan ta topa cu hopi problema social y nan kier trankilidad den e hogar di e alumnonan, pa nan yega mas cerca di e mayornan nos a dicidi di haci esaki, pa mayornan tambe ser conoci cu tur e instancianan cu Aruba tin, y kico nan por ofrece nan, y ki ayudo nan por haya di nan.

Haildy Castaño a sigui splica cu e instancianan manera Departamento di Asunto Social, Centro pa Hoben y Famia, FADA, Wit Gele Kruis, Fundacion Respeta Mi, SPD, CAA, MBC, Famia Planea, y Fundacion pa Nos Muchanan.

“Pues, tur hende riba mesun tereno; algun preventivo, algun curativo, pero tur trahando hunto cu e mesun amor pa e muchanan y nos famianan, y purbando di ta mas cerca di nos hendenan, pa di un forma trempan y lihe, atende cu cosnan cu no ta bayendo bon”, el a indica.

El a agrega cu e idea ta pa hendenan ta conciente cu nan tey pa yuda, pa wak pa bo ta miho, pa e comunidad, dia di mañan, por ta mas stabil y mas feliz.

Scol tin experiencia cu tin hopi problema den famia, pero tambe cu no tur hende ta sali busca ayudo. Hopi biaha e hendenan tin e tendencia pa purba soluciona riba nan mes, of den nan mes red social, y esey ta haci cu nan no ta haya probecho di tur e ayudo profesional cu tin eyfo, y como consecuencia, lamentablemente, como consecuencia e famianan aki ta keda cay den un problema social, cu no mester tabata asina grandi.

“Dus, nos kier ta mas ‘outreaching’ y nos ta hopi contento pa wak cu scol ta mesun cos, y e tambe kier yega cerca di su hendenan pa asina purba cera un ‘join venture’, nos por bisa, cu tur e famianan aki, pa wak con nos por yuda otro ta miho para dia di mañan”,  Castaño- Ridderstap a reitera.

Di parti di e director di Scol Basico Xander Bogaerts, Ustelle Cornet, cu ora mayornan ta pidi un yudanza pa un problema, scol ta yuda nan, y tambe sa sosode cu mayornan ta bin cerca dje na oficina, y nan ta splica kico tur nan preocupacion ta y ta puntra con scol por yuda nan.

“Asina nos a acerca diferente instancia, pasobra nos no por laga nos mayornan asina ey, pasobra loke ta pasa na cas ta refleha na scol tambe, cu e muchanan”, Cornet a comenta y a agrega cu scol ta ripara ora un mucha ta cambia na un manera cu e no tabata y nan mes ta ya e mayornan y ora scol puntra “con nos por yuda?” nan ta conta nan problema, y scol ta acerca e diferente instancianan cu por brinda ayudo.