Un desaroyo interesante y actual:
ORANJESTAD (AAN) – No tur persona na Aruba conoce, of ta conciente di kico “economia circular” ta of ta nifica, y esaki ta un desaroyo interesante den cual e actual Minister di Economia, kier conduci Aruba.
E tema aki ta di actualidad tur caminda di mundo y, casualmente, revisando algun archivo den un file, por a ripara cu DIARIO a yega di skirbi al respecto un par di aña pasa, unda ta splica cu economia circular ta un modelo di produccion y consumo, relativamente nobo, cu ta busca garantiza un crecemento sostenible den tempo.
Economia circular ta promove e optimizacion di recursonan, e reduccion den e consumo di materia prima y e probechamento di residuo, reciclando nan of dunando nan un bida nobo pa converti nan den productonan nobo.
E obhetivo di e economia circular ta, consecuentemente, probecha na e maximo posible tur e recursonan material existente, expandiendo asina e ciclo di bida di e productonan.
E idea ta pa imita e naturaleza na unda tur cos tin balor y tur ta wordo probecha, na unda e residuonan ta bira un recurso nobo. Asina, ta logra mantene e ekilibrio entre progreso y sostenibilidad.
Economia circular vs Economia linear: Te awor e modelo cu a wordo uza ta esun di produccion linear; kiermen, extrae, produci, consumi y desecha. E sociedad den cual nos ta biba ta haci cu e ritmo di consumo ta acelerando y pesey ta e economia lineal ta un modelo di produccion lihe, pero poco sostenible pa e planeta.
E economia circular ta establece un modelo di produccion y consumo mas sostenible, den cual e materianan prima ta dura mas tempo den e ciclonan productivo y por probecha nan di forma recurente, percurando asina genera hopi menos residuo. Manera su nomber mes ta indica, e esencia di e modelo aki ta radica den e maneho di e recursonan, pa nan wordo mantene den e economia pa e maximo tempo posible, promoviendo cu e residuonan cu ta wordo genera por sirbi di materia prima, pa otro industrianan.
Pa loke ta e medio ambiente, e modelo circular aki ta reduci e emisionnan toxico, ta minimiza e consumo di recursonan natural y ta disminui e produccion di residuo.
