ORANJESTAD (AAN): Parlamentario Mike de Meza, despues di a reuni cu abogado mr. D. Croes y Duijneveld,
a tuma e decision cu ta bay cuminsa un otro caso sumario contra Ministerio Publico. Por a compronde cu e abogado y hurista di de Meza, no ta haya cu Ministerio Publico a cumpli cu e sentencia anterior di Hues.
Manera ta conoci, Hues den su sentencia di e caso sumario di Mike de Meza contra Ministerio Publico, a ordena Ministerio Publico pa informa de Meza si e ta un sospechoso y kico ta e acusacion. Ministerio Publico a informa Mike de Meza su abogado mr. D. Croes cu Mike de Meza ta un sospechoso y a menciona un articulo di ley pa cual ta sospecha Mike de Meza.
Abogado mr. D. Croes y hurista Duijneveld, a studia e carta di Ministerio Publico y ta di opinion cu Ministerio Publico no a cumpli cu e sentencia di Hues.
Despues di a reuni cu Mike de Meza, a dicidi cu ayera ta entrega un peticion na Corte di Husticia pa un otro caso sumario. Por a compronde cu den e peticion di e caso sumario, nan ta pidi Hues pa ordena Ministerio Publico cumpli cu e sentencia y tambe nan ta exigi pa Ministerio Publico dicidi si ta cuminsa un caso penal contra de Meza of no.
Corte di Husticia, despues di haya e peticion, lo bay evalua e schedule di casonan y lo fiha un fecha pa tratamento di e caso sumario.
