Winston Tavarez di Fundacion Dominicana Arubaanse Juan Pablo Duarte:
ORANJESTAD (AAN) – Formador Evelyn Wever-Croes, den cuadro di e reunionnan cu stakeholders, den e proceso di formacion di gobierno nobo, den e area di Imigracion a reuni tambe cu Fundacion Dominicana Arubaanse Juan Pablo Duarte, y den conferencia di prensa señor Winston Tavarez, presidente di e Fundacion, a duna su comentario tocante e reunion aki.
Tavarez a bisa cu e reunion aki a bay excelentemente bon, y e ta haya e tipo di reunionnan aki hopi importante, pa sa con formacion di gobierno ta bayendo.
Su encuentro cu Formador Wever-Croes a bay den bon ambiente unda e por a trece dilanti e puntonan di preocupacion cu tin den e comunidad Dominicano na Aruba.
E puntonan mas halto di preocupacion cu e fundacion a trece dilanti ta e parti di vivienda, alimento, trabao pa esnan cu a perde esaki door di e pandemia, y kico ta bay pasa den e siguiente stapnan. Desde e principio di e pandemia, Tavarez a splica, hopi Dominicano a keda sin trabao y a haya yudanza cu pakete di cuminda for di e Fundacion mes via Fundacion pa Nos Comunidad, y di e poconan cu ta trahando nan ta hayando 60% di salario, loke no ta yega nan pa cubri tur nan gastonan, y esey a wordo treci dilanti den reunion cu Formador.
Aunke Republica Dominicana no ta genera casi personanan ilegal pa Aruba, si a menciona na Formador cu hopi di e Dominicanonan cu a keda sin trabao door di e pandemia, kier bay nan pais bek, y esaki ta un punto di preocupacion debi cu nan no tin entrada.
