ORANJESTAD (AAN): Manera cu DIARIO a publica recien, hecho ta cu Diasabra awor tin atrobe,
algo a birando popular na Aruba, esta cu diripiente bo ta haya un ‘Pop-up Bar’, of un ‘Pop-up Restaurant’.
Pero ta popular tambe e ‘Pop-up Market’ cu Santa Rosa ta bin cune de vez en cuando. Y a bin haya sa cu nan ta cla pa e prome pa aña 2025 aki.
Randy Maduro di Santa Rosa a indica cu nan prome actividad pa 2025 ta bay bira tambe nan prome Pop-up Market di e aña aki riba Diasabra 1 di Februari 2025. Pesey mes, tur hende cu por a planta algo di lunanan di October, November y December, y cu ainda awor na Januari tin cosecha, tur e personanan aki y demas cunukero, criado, of piscado tin chens di acudi na Santa Rosa pa e Pop-Up Market aki.
Maduro a splica cu e ta cuminsa trempan caba, for di 8:00 am te cu 11:00 am. Esnan cu yega prome lo haya awa limpi! El a agrega cu lo bay tin bendemento di Pinda di cunucu, boonchi, carni fresco, y tambe cos chikito. Tur lo ta na un escala mas chikito compara cu e ‘Mercado Santa Rosa’.
“Toch lo bay tin como 15 productor local cu ta bay bin ofrece nan productonan fresco,” Maduro a splica.
El a remarca cu e awacero abundante di ultimo simannan a yuda hopi productor cultiva basta pinda, boonchi, y comcomber. Pero for di ora cu a planta e matanan, ya e ‘cultivo’ di pinda, etc., tin ‘nomber di cumprado’ riba nan. Pues e demanda pa e cultivo local ta basta grandi.
