Jurima Bryson:
*Na Curacao di 90% pa 95% casonan a wordo resolvi
ORANJESTAD (AAN) -- Pa splica con el a funciona mr. Bryson a duna un ehemplo di Curacao. Siman pasa e Ombudsmannan di Reino tabata na Aruba pa un encuentro y durante e charla cu el a duna, Ombudsman Curacao a splica cu, por ehemplo, e ta ricibi un cifra di mas of menos mil keho pa aña, di cual mas of menos 90% pa 95% e ta resolvi. “Esey ta nifica cu e kehonan ey no ta resulta den un rapport manera Ley ta bisa, pero simplemente, door di su intervencion e kehonan a wordo resolvi”, mr. Jurima Bryson a menciona.
El a agrega cu ta trata aki di kehonan di diferente indole, y e ta nifica cu di mil keho cu bo ta resolve, 90 pa 95%, esey toch ta basta. “Esey ta nifica cu Ombudsman sigur tin su balor agrega pa e comunidad. Sigur si bo bisa hende no mester haci e proceso di bay un abogado, bay Corte, etc. Pasobra tin bez no ta problemanan hopi complica. Ta cosnan cu pa un motibo of otro e instancia cu e persona, of e instancia cu e instancia no ta sali afo, anto cu intervencion di Ombudsman si e ta logra”, Ombudsman mr. Bryson a subraya.
El a expresa cu Ombudsmannan di Reino a splic’e nan procedure, no extenso, pasobra na momento cu nan tin nan personal nan lo bay haci un training tambe, pa wak con Ombudsman na Aruba ta bay trata e kehonan; ki procedure pasobra tin e Ley pero mester tin linea di maneho, con bo ta bay hacie, etc., anto na momento cu tur esey ta cla lo informa pueblo tambe cual ta e maneho.
“Pero, mi kier cuminza di bisa cu manera mi a splica nos tin cu atene nos mes na Ley, y cu corda cu Ombudsman no por trata tur keho. Ademas di esey, mi kier bisa adelanta, manera mi a bisa durante e charla tambe, y mi coleganan Ombudsman tambe a splica esey, corda cu prome cu bo yega cerca Ombudsman ya bo mester a entrega un keho caba cerca e instancia concerni, esey kiermen cu nos ta e di dos linea cu bo ta yega cerca dje. Esey pasobra bo tin cu duna e instancia cu bo tin keho riba dje, e oportunidad pa resolve e keho. No por bisa cu no a resolve e keho si bo no a dune un chens” mr. Jurima Bryson a relata.
