ORANJESTAD (AAN) – Randy Maduro, Relacionista Publico di Departamento di Agricultura, Cria y Pesca (LVV-Santa Rosa),
a splica den conferencia di prensa, cu Santa Rosa semper ta bisa cu unico caminda cu por tira sushi awo ta na Ecotech of otro companianan cu ta duna e servicio y cu por duna e cliente algo p’e.
“Pero na oriya of banda di dam no ta caminda pa tira desperdicio. Mi ta sigur cu busca un baki, of e companianan cu ta ofrece bakinan di sushi, anto benta bo sushi den baki y laga nan bin lante y asina deposit’e den e lugar indica, y no bay tir’e na oriya of banda di dam”, Randy Maduro a reitera.
Maduro a señala cu tabata tin algun siman di awacero y tog nos a logra haya un poco di awa, aunke e no ta suficiente. “E sushinan aki, na momento cu awa ta yobe ta bay termina den e dam y ta bay trece contaminacion, sushi den e dam y ta haci e agricultor cu ta bay coi awa cu su tanki chikito, ta dificulta su trabao, e por daña su tanki, sushi por pega den su pomp, y den su slangnan na momento cu e ta chicando e awa”, Randy Maduro a acentua.
El a adverti esnan cu ta benta sushi na cant’i dam pa no hacie mas, pasobra ademas, si polis ta haya e persona aki e por dun’e un sancion.
“Di nos parti esey no ta e caso, pero si hendenan mira cu personanan ta tira sushi banda di dam, libremente tira contacto cu polis y laga polis actua riba esaki sigur. Pero na dam no ta caminda di tira sushi!”, Maduro a remarca.
Si Santa Rosa ta haya e sushinan aki nan ta hacie limpi, sea pasobra nan ta wordo invita di parti di Buro City Inspector, of BCI mes ta hacie limpi, of Santa Rosa mes ta sali cu si ekiponan pisa, pa haci e lugar limpi. Asina Randy Maduro a comenta.
El a agrega cu nos tin un par di siman cu no ta haya awacero, y Santa Rosa ta spera cu por haya un tiki yobida, pero sigur den e temporada di October-November-December ta caminda Aruba ta haya mas awa.
Finalmente, el a bolbe pidi comunidad pa no tira sushi na oriya of banda di dam, pasobra esaki ta dificulta e trabao di nos agricultornan cu si mester di e awa di dam pa nan cultivonan.
