Santa Rosa a lanza un app pa acumula informacion for di agricultornan

ORANJESTAD (AAN): Diabierna mainta na Departamento di Agricultura Cria y Pesca (Santa Rosa) a tuma lugar un conferencia di prensa relaciona cu introduccion di un sistema nobo pa nos agricultornan registra.

    Director di Santa Rosa Nathalie Maduro a splica cu Diabierna pa Santa Rosa y economia en general ta un dia hopi importante.

   “Hopi biaha nos kier haci hopi mas den sector primario pa demostra e potencial y kico eingelijk ta e produccion cu tin legalmente”.

   Nos por wak cu specialmente durante e pandemia di Covid-19 a bin un interes enorme bek pa plantacion, pero lamentablemente hopi biaha nos no tin e datonan pa mustra e determinacion, e compromiso y tambe e potencial cu eigenlijk e sector ta brinda na Aruba su economia, segun Maduro.

   El a sigui bisa cu e ta na altura cu Gobierno tin agricultura como un di su sectornan prometedor y cu esey ta duna Santa Rosa e estimulo pa bin cu hermentnan pa facilita informacion pa por duna mihor conseho posibel na e minister y na Gobierno en general.

“Locual nos a haci ta crea un sistema moderno”.

Nos sa cu awendia hopi di nos grandinan tin smart phone y Facebook, pues esaki no ta by ta algo dificil pa ningun productor.

E app cu ta wordo lanza awe ta yuda nos acumula informacion di cada un di nos productornan.

Nos ta bay cuminza cu e parti di agricultura, pero eventualmente nos ta bay amplia esaki pa por haya datonan tambe di crianza di bestia y pesca, segun Maduro, kende a enfatiza cu e app ta un herment cu Gobierno ta crea pa haya datonan cu ta bay yuda e sector.

No ta datonan cu ta bay wordo uza pa crea mas dificultad, segun Maduro, kende a indica cu si tin hende cu tin pregunta nan por acerca Santa Rosa.