ORANJESTAD (AAN): Minister di Turismo y Salud Publico sr. Dangui Oduber ta anuncia cu den luna di november Aruba ta spera 31 calls di barconan crusero.
Esaki ta un subida substantial di locual a spera inicialmente den luna di november.
E mandatario a señala cu inicialmente entre lunanan november y december Aruba tabata spera 18 calls y awor den november so tin 31 calls cu ta confirma.
Schedule di barco crucero den luna di november 2021 a conoce un aumenta significante di 22 calls mirando cu den oktober lo tin 9 calls. Minister Oduber ta splica cu Ministerio di Turismo, APA y ATA ta keda traha na un manera pro-activo pa sigui acerca mas linea crucero pa bin Aruba, tambe pa splicanan kico e situacion ta na Aruba. Na mes momento lo comparti tambe e protocolnan cu lineanan crucero lo mester sigui. Minister Oduber contento di mira cu e turismo crusero tambe ta recuperando.
Despues di un temporada scur pa nos turismo crusero, awor poco poco esaki tambe pronto lo yega 100% di recuperacion. Gobierno ta haci hopi esfuerso pa cruceronan por ta back na Aruba. Den november lo ta yegando barconan crusero di diferente linea crusero.
E siguiente linea cruseronan cu lo ta yegando ta Celebrity Cruises, Royal Caribbean Cruise lines, Carnival Cruise Lines, TUI Cruises, AIDA Cruises, Princess Cruises, Marella Cruises, MSC Cruises, Holland America Line, Windstar Cruises, y Azamara Cruises.
Aruba tabata e prome destinacion pa e cruceronan. Cu esaki Aruba ta continua su recuperacion di nos turismo crucero. Sigur esaki ta crea oportunidadnan pa nos economia, pa e cuponan di trabao, pa tour operators, pa taxistnan, pa restaurantnan y tiendanan di retail.
Minister Dangui Oduber ta contento di mira cu e turismo crusero tambe ta recuperendo mescos cu e bishitantenan stayovers, superando e proyeccionnan. Aruba ta progresando y manera nos a bisa den campaña, nos pais lo prospera back.
