ORANJESTAD (AAN)—Departamento di Agricultura, Cria y Pesca (LVV) popularmente yama Santa Rosa, a yama un conferencia di prensa, relaciona cu e lanzamento di su campaña di concientizacion “Food Security”.
Señora Nathalie Maduro, director di Santa Rosa, a hiba palabra y a bisa cu e campaña aki a cuminza, eigenlijk, na aña 2020 y e tabata un cooperacion entre LVV y Departamento Economico.
Maduro a splica cu despues di Covid-19 nan a ripara cu e interes pa planta bek a cuminza crece, vooral esnan cu tabata na cas, cu kier a produci nan propio cuminda.
Tambe por a mira cu tabata tin cierto limitacionnan y esaki a haci cu a bin e oportunidad pa por haya fondonan di Union Europeo, pa asina por a bin cu un plan.
El a agrega cu na 2021 a logra di haya un rapport completo di kico tur ta e posibilidadnan cu por wordo desaroya na Aruba, cu no solamente ta aporta na cuminda, pero cu alavez por crea oportunidad di negoshi.
Nathalie Maduro a expresa cu esaki tabata un atardi hopi importante, unda cu no solamente por a bin cu mensahenan sino tambe bin cu proyectonan cu, a largo plazo, Aruba lo tin beneficio di dje, y sigur awor cu prijs di cuminda ta subiendo.
Maduro a subraya cu ta importante pa e instancianan aki traha hunto, y cu e ta contento di tin e support di Minister Ursel Arends, no solamente pa lanza e campaña aki, pero pa por sigui traha hunto riba dje.
